Thursday, July 18, 2013

၁၉၄၇ ခုနှစ် ၊ ဇူလိုင်လ ၁၉ရက် ၊ နံနက် ၁၀ နာရီ ၃၇ မိနစ်

၁၉၄၇ ခုနှစ် ၊ ဇူလိုင်လ ၁၉ရက် ၊ နံနက် ၁၀ နာရီ ၃၇ မိနစ်



ဆုတံဆိပ်များ ဘဏ့်ကဒ်များ ရတနာသိုက်ရှာဖွေရာမြေပုံကားချပ်များ
ထားပါတော့။
ထရပ်ကားကြီးတစ်စီး စပိန်နွားရိုင်းတစ်ကောင်လိုဂမူးရှူးထိုး ကိုယ့်တည့်တည့်ကြီးပြေးလာနေတယ်ဆိုပါစို့။
ထားလိုက်ပါ။

တနင်္ဂနွေမရောက်ခင် စနေရဲ့တုန်ခါမှုကြီး။
ထားလို့မရ။

ဂေါတမဗုဒ္ဓမြတ်စွာဘုရား ဓမ္မစကြာတရားဦးစအဟောမှာ
မဟာပထ၀ီမြေကြီးတုန်ခါသွားသလို သစ္စာလေးပါး ကမ္ဘာမြေကြီးပေါ်ပြန့်ကျဲသွားတဲ့စနေနေ့မျိုးမဟုတ်။

ထားလို့မရ။

၁၉၄၇ ခုနှစ်

ဘယ်တော့မှ နေမ၀င်သွားတဲ့ နေ့စွဲတစ်ခုဟာ
တစ္ဆေသရဲတစ်ကောင်ရဲ့လျှာတစ်ချောင်းလို ကျွန်တော်တို့အိမ်နံရံတွေပေါ်မှာ ရွှဲရွှဲစိုစီးကျလို့
ကျွန်တော်တို့နှလုံးသားတွေကို ကနေ့အထိထိုးလျက်နေဆဲ ။

ဇူလိုင်လ ၁၉ ရက်

အ၀တ်စတစ်စကိုဆုတ်ဖြဲသလို ကျောက်တုံးကို အဲ့ဒီနေ့ကဆွဲဆုတ်လိုက်
လမ်းပေါ်ကိုလူတွေ အစိတ်စိတ်အမွှာမွှာပြဲဆင်းလာတယ်။  အဲ့ဒီနေ့က

စနေနေ့

ဘုန်းကြီးတွေ ပုလိပ်တွေ စစ်သားတွေ အရပ်သားတွေနဲ့အတူ
သူ့အမေအရင်းသေတာတောင်
ဘယ်လိုငိုရမှန်းမသိတဲ့ outsider ထဲက မားဆိုးဆိုတဲ့ကောင်တောင်ပါသေးမယ်ထင်ရဲ့ အဲ့ဒီနေ့က။

နံနက် ၁၀ နာရီ ၃၇ မိနစ်

မပြောပါနဲ့ အဲ့ဒီနေ့အကြောင်း
ပြည်သူက ပိုးမွေးသလိုမွေးခဲ့ရတဲ့ သူတို့အကြောင်း
မပြောပါနဲ့ အဲ့ဒီနေ့အကြောင်း
သေမင်းကတောင်သေမှာကြောက်လို့ ပိုးမွေးသလိုပြန်မွေးခဲ့ရတဲ့ သူတို့အကြောင်း
မပြောပါနဲ့ အဲ့ဒီနေ့က
လွတ်လပ်ရေးကတောင် မလွတ်လပ်မှာကြောက်လို့ ပိုးမွေးသလိုမွေးလာခဲ့ရတဲ့ သူတို့အကြောင်း။

အဲ့ဒီနေ့ကလူတွေအားလုံး ပခုံးဆစ်ရိုးတွေပြုတ်ထွက်သွားတာကို
၁၉ ဇူလိုင်က တွေ့ခဲ့တယ်
မြို့ကြီးများ ကိုင်းပင်များကွေးညွှတ်ကျသလို ကိုင်းကျသွားခဲ့ကြတာကို
၁၉ ဇူလိုင်က တွေ့ခဲ့တယ်
အဲ့ဒီနေ့က
မိခင်တစ်ယောက်ရဲ့ရင်သားများပြုတ်ထွက်သွားသလို ဒီမြေပုံကြီးရပ်ကျန်ခဲ့ပုံကို
နို့ဆာပြီးလူးလွန့်ကျန်ရစ်ခဲ့တဲ့မီးတွင်းထဲကထွက်ကာစ ကလေးတစ်ယောက်လို
ဒီ ၁၉ ဇူလိုင်ဟာ ကောင်းကောင်းတွေ့ခဲ့ရ။

Nut တွေအားလုံးအဖြုတ်ခံထားရတဲ့ ကားတစ်စီးဟာ
ရှိသမျှနတ်ကောင်းနတ်ကောင်းမြတ်အားလုံးကိုတွန်းချ
(အဲ့ဒီနေ့ကစပြီး)
မိုးတသဲသဲရွာပြီး သွေးတပွက်ပွက်အန်နေတဲ့လမ်းမကြီးပေါ်မှာ
နောက်ထပ် ဘယ်သူ့မှလူမထင် ဘယ်မှတ်တိုင်မှ ဒင်း(သင်း)မရပ်
သေနတ်တွေ တုတ်တွေ ဓါးတွေ မီးခြစ်တွေကိုင်ပြီး လီဗာကိုတစ်ဆုံးတင်
ဘုရားရှေ့တရားရှေ့မရောက်ခင် တရှိန်ထိုးပြေးလာနေတဲ့ နာဠာဂီရိဆင်ကြီးတစ်ကောင်လို
ရပ်ကွက်ထဲ မဆိုင်သူမကပ်နဲ့ဝါဒကိုဆွဲဖြဲပြီးဝင်သွားတဲ့အရက်သမားတစ်ယောက်လို
ဆဲပြီးဝင်လာတော့တယ်အဖတို့ရေ။


ဂြိဟ်ကြီး ၉ လုံးရဲ့ဈာပနကို
စကြာဝဠာဆိပ်ကမ်းက ငေးကြည့်နေရတဲ့ကြယ်ကလေးတွေလိုဘာမှမတတ်နိုင်ခဲ့။
ဂုဏ်တော် ၉ ပါး လွတ်ကျသွားလို့
ငရဲဆီနိမ့်ဆင်းသွားတဲ့ ၀ိဥာဉ်တစ်ခုလို တိုင်းပြည်တစ်ပြည်မှာ ဘာမှမတတ်နိုင်ခဲ့။


အဲ့ဒီလို နှစ် ၆၀ ကျော်

ကျွန်တော်တို့ နှမချင်းလည်းစာနာမှုမရခဲ့
ဓါးနဲ့ပေါက်သလို ငေါက်ငမ်းမှု ကျာပွတ်နဲ့ရိုက်သလို ရှိုက်ငင်မှု
လိုအပ်ရင်မျက်နှာချိုတောင်မသွေးပဲ ထောင့်ကျည်းတွေထဲကန်ထည့်
မလိုအပ်တော့ရင် လူသေလို့သွန်ချပစ်ခဲ့တဲ့ ဒီကားစုတ်ကြီးပေါ်မှာ
တစ်ခါတစ်ခါ
ငေးတိငေးကြောင်သုံ့ပန်းတွေလို ထိုင်လျှက်သား
တစ်ခါတစ်ခါ
ကြိုးစင်မှာ ကြိုးကွင်းစွပ်လျှက်သားရပ်နေရတဲ့ ရာဇ၀တ်သားတွေလို လိုက်ပါခဲ့ရ။

မတော်တဆ ပြတင်းပေါက်က လှမ်းကြည့်မိရင်တော့
မှုန်ဝါးဝါးတစ်စပြင်ထဲ လျှောက်နေတဲ့ နာနာဘာဝတွေလို
သွားလာသေဆုံးနေတဲ့ လူတွေနဲ့တစ်မြိုလုံးပြည့်နေတာကိုခြောက်ခြားဘွယ် ခင်ဗျားတို့ထပ်ပြီးတွေ့မြင်ကြရဦးမှာပါပဲ။

                                                                                                                       ခရမ်းပြာထက်လူ
                                                                                                                       (   ၂  ၀  ၁  ၃  )
(သူနဲ့ပတ်သက်ရင် ကျွန်တော့်မှာ မငြိမ်းသောမီး မခန်းသောခရီးတွေနဲ့မို့ သူနဲ့ပတ်သက်ရင် ကျွန်တော့်မှာ နေ့ထူးနေ့မြတ် ဆိုတာ သီးခြားမရှိပါ သူနဲ့ပတ်သက်ရင် အိမ်ပြန်ရောက်တိုင်း ဘုရားစင်မြင်နေရသလို သူနဲ့ပတ်သက်ရင်....)

0 comments: