ကိုညို
“အာလူးနဲ့ပဲ ခိုးစားနေတဲ့သူတွေနဲ့ တော်လှန်ရေးအောင်မြင်ပါ့မလားကွ”
“အာလူးခိုးစားနေသူတွေက တော်လှန်ရေးလုပ်ကြမှာတဲ့လားကွ”
ည ၁၁နာရီဝန်းကျင်၊ တိတ်ဆိတ်နေတဲ့အချိန်၊ မဏိပူရ တောင်နံရံတွေတောင် ပဲ့တင်ခတ်ပြီး
စူးစူးဝါးဝါးထွက်လာတဲ့ အသံနက်ကြီးကြောင့် ရုံးခန်းထဲမှာ စာဖတ်နေရင်း ဦးဇင်းဦးဝရနဲ့ ကျနော် ဘားတိုက်အပြင်ကို ပြေးထွက်ကြည့်လိုက်တယ်။
ကိုလှစိုးပါ။ မန္တလေးတက္ကသိုလ် မြန်မာစာဌာနက ဖျင်တိုက်ပုံထူထူ၊ လုံခြည်တိုတိုနဲ့ လည်ပင်းမှာ မာဖလာ ပတ်ထားတယ်။ သူ့ရဲ့ ခံစားမှုမီးတောက်က မဏိပူရဆောင်းရာသီ အအေးဒါဏ်ကို အနိုင်ယူထားတယ်။ “အာလူးနဲ့ ပဲ ခိုးစားနေပြီး တော်လှန်ရေးလုပ်အုံးမှာတဲ့လား”
ဦးဇင်းဦးဝရကို မြင်တော့ ကိုလှစိုးငြိမ်လိုက်တယ်။ ဘားတိုက်ထဲ ပြန်ဝင်သွားတယ်။
ကျနော်တို့တတွေ အားလုံးမျက်နှာတွေ မကောင်းကြဖူး။ အားလုံး ခေါင်းငိုက်စိုက်တွေ။
လက်ရှိဘ၀အနေအထားတွေကို အားလုံးက မကြေနပ်ကြတာအမှန်။ စခန်းကလူကြီးတွေကိုလည်း အားနာတယ်။ သူတို့လည်း ရဲဘော်တွေအားလုံး လုံလုံလောက် လောက်စားနိုင်အောင် စီစဉ်လိုက်တာပဲ။ တခြားနည်းလမ်းလည်း ရှာမတွေ့တော့ ငတက်ဖျားနည်း သုံးလိုက်တာ။
ဖြစ်ပုံက ဒီလို...။ ဒုက္ခသည်စခန်းမှာက ရိက္ခာမလောက်င၊ ထမင်းမ၀၊ ဟင်းမလောက်ပြဿနာကအမြဲကြုံတယ်။ ပြဿနာတခုခုဖြစ်ပြီဆိုရင်…အဲဒီစားဖိုဆောင်ကနေ စတာများတယ်။ ကသဲအာဏာပိုင်တွေ ရိက္ခာထုတ်ပေးတာက လူတယောက် ဆန်၊ ဆီ၊ ကြက်သွန် ဘယ်လောက်နှုန်းဆိုပြီး ပေါင်းပေးတာ။ သူပေးတဲ့ လူဦးရေအမှန်ဆို ကိစ္စမရှိ၊ လူက တိုးလာတာဆိုတော့ မလောက်ဖူး။ ဒါတောင် တချို့ စိတ်ဓာတ်ကျပြီး ပြန်သွားရင် ရိက္ခာထုတ်ပေးတဲ့ “ရိုခူးမား”ကို အသိမပေးဘဲ မှိန်းထုတ်နေတာ။ နောက်မှ အသိပေးတာ။
ကျနော်တို့ကိုပေးတာ မလောက်ငှတာလည်း ခဏခဏ တင်ပြတယ်။ သူတို့ကလည်း အထက်ကလာတဲ့စာရင်းအတိုင်း ပေးတာလို့ပြောတယ်။ ကျနော်တို့က မယုံဖူး။ ဒီလူတွေ ဒုက္ခသည်တွေဆီက ဖြတ်ခိုးနေတယ်လို့ထင်တယ်။
သူတို့ခိုးတာ အရေးမကြီးဖူး။ ကိုယ့်ရဲဘော်တွေက မ၀ရေစာစားရတော့ ခဏခဏပြဿနာများတယ်။ ဒါနဲ့ပဲ ငတက်ဖျား အော်ပရေးရှင်းကိုကြံစည်ခဲ့တာ။ ရိက္ခာဂိုဒေါင်က ကျနော်တို့ရုံးခန်းနဲ့ ကပ်ရက်ပဲ။ သော့ကိုတော့ သူတို့ ယူထားတယ်။ သူတို့ကလည်း သော့ ၂ ထပ် ခတ်ထားတာ။
ဒါပေမဲ့ ဂိုဒေါင်အပြင်ဘက်အပေါ်က လေ၀င်ပေါက်(လေသာပြူတင်းပေါက်) မှန်တခါးလေးရှိတယ်။ လွယ်လွယ်ဝင်လို့မရဖူး။ နံရံကနေ တယောက်က ထမ်းတင်ပေးရင်..
ခန္ဓာကိုယ်သေးသေးတယောက်က အသာရှိုပြီးဝင်ရတာ။ ကလေးမြို့က “စန်းနိုင်”က ဘော်ဒီသေးသေးကွေးကွေးလေး။ သူက ပင်တိုင်ရိက္ခာဂိုဒေါင် တက်ခိုးရတယ်။ သိတ်များများယူလည်း ရိပ်မိမှာစိုးတော့ ကြက်သွန်ဥ တပိသာ၊ ဆန်တပီ၊ ဆီအစိတ်သား.. သကြားနည်းနည်းပေါ့။ မစို့မပို့လေးကို နာမည်ပျက်ခံပြီး အသဲအသန်ခိုးရတာ။
အဲဒါကြီးကို အားလုံးက သိတ်မကြိုက်ဖူး။ အငတ်ခံမယ် မခိုးဖူး၊ အဟာရပြည့်မီအောင်တော့ စားဖို့လိုမယ်ဘာညာနဲ့...
သဘောထားအမျိုးမျိုးကို ခေါင်းဆောင်ပိုင်းက ဆွေးနွေးအစည်းအဝေးလုပ် မဲခွဲပြီးဆုံးဖြတ်ကြတာ။ ရိက္ခာအခြေအနေမကောင်းရင်
“စန်းနိုင်”တို့ ငတက်ဖျားအော်ပရေးရှင်းလုပ်ရပြီ။ ဒီလိုနဲ့ “အာလူးခိုးစားသူတွေရဲ့ တော်လှန်ရေး”
ဆိုပြီး ဝေဖန်သံတွေကြားရတော့တာပဲ။ ကျနော်တို့ “ဒီမိုကရက်တစ်ပြောက်ကျားတပ်ဦး”(BDGF)က ရန်သူကိုသာ ပြောက်ကျားတိုက်ပွဲ မဆင်နွှဲရတာ..
ကျနော်တို့ပတ်ဝန်းကျင်က အရွက်တွေ၊ အပွင့်တွေ၊ အသီးတွေ၊ တွားသွားသတ္တ၀ါနဲ့ အင်းဆက်ကောင်တွေကိုတော့ မကြာခဏပြောက်ကျားစစ်ဆင်ပြီး တိုက်လေ့ရှိတယ်။
ဒီအကြောင်းတွေ ပြောပြမယ်။
ပြောက်ကျားအဟာရ၊ ပြောက်ကျားဗီတာမင်တွေအကြောင်းပဲ ဆိုပါတော့။ ရီစရာတွေထဲက မောစရာတွေပေါ့။
ကျနော်တို့အားလုံး စခန်းကနေ၊ နေ့လည်တကြိမ်၊ ညနေတကြိမ်၊ တောင်ခြေက ချောင်းထဲရေချိုးဆင်းတတ်ကြတယ်။ ထုံးစံအတိုင်း လက်နက်ကိုင်အစောင့်တွေနဲ့အတူပေါ့။
အုပ်စုလိုက် လူရေတွက်ပြီး ဆင်းရတာ။ ချောင်းထဲဆင်းရရင် ပျော်တယ်။ တောထဲမှာ ဇီးဖြူသီးပင်တွေပေါတယ်။ ဇီးဖြူသီးတွေကို
ဆား၊ငြုပ်သီး ထည့်ထောင်းရင် ဟင်းတခွက်ပေါ့၊ အဲဒီအချိန် ငပိတွေဘာတွေ ဘယ်ရှိမှာလဲ။
နောက်ချောင်းထဲက ဂဏန်းကျင်းတွေနှိုက်ပြီး မီးဖုတ်စားတယ်။ ကဗျင်းရွက်(ချဉ်ပေါင်လိုချဉ်ပြီးအချဉ်ဟင်းချက်တယ်)နဲ့
ဖလောင်မွှေး၊ သရက်ကင်းရွက်တွေလည်း ရလေ့ရှိတယ်။ တခါတော့ သရက်ဖူးလို အဖူးတွေနဲ့ အပင်တချို့တွေ့တယ်။
တမူးက၊ ၀င်းနောင်နဲ့ ကျနော်ရေးချိုးသွားရင်း အဖူးတွေ ခူးပြီးမြီးကြည့်တယ်။ ဖန်သက်သက်နဲ့၊ သရက်ဖူးအရသာလိုပဲ၊ အနံ့တော့မရှိဖူး။ လျှာတွေ ဘာတွေလည်း မယားဖူး။ ဒါနဲ့ပဲ
ခူးချလာတယ်။ စခန်းထဲအ၀င် အားလုံးက မေးကြတယ်။ ကျနော်က ခတ်တည်တည်ပဲ“ဖြူဂျီဖူး”လို့ ပြောလိုက်တယ် ဖြူဂျီဖူးကို ချောင်းထဲက ဖမ်းလာတဲ့ ဂဏန်းလုံးမီးကင်၊ ငါးရေပေါ်ငါးသေးသေးလေးတွေကင်ပြီး ရွှေလှံဘိုငြုပ်သီးစပ်စပ်၊ ဆားထည့်ထောင်းစားရင် စားမြိန်ကောင်းပဲ။
ကျနော်တို့တတွေ အသားမစားရဖူးဆိုပေမဲ့ ကိုယ့်မှာရှိတဲ့နာရီ၊ ဆွဲကြိုး၊ လက်စွတ်တွေကို ကသဲ စစ်သားတွေဆီ ထုလိုက်ရင် အမဲခြေတောက်နဲ့ စားစရာတချို့ ရလာတာပဲ။
ကျနော့နာရီလေးဆို တလကျော်တာနဲ့ ကျွဲခြေတောက်ဖြစ်သွားတာပေါ့။ “ချန်ဒယ်မြို့”လေးက ၂မိုင်ကျော်ဝေးမယ်။
စခန်းက ခိုးထွက်ပြီး တောလမ်းအတိုင်းခြေကျင်လျှောက်ရင်ရောက်တယ်။
ချန်ဒယ်ဈေးထဲကနေ အမွှေးမီးမြှိုက်ထားတဲ့ ကျွဲခြေတောက်တစ်ချောင်းဆို လူ၅ယောက်စာအ၀ပဲ။ ကျွဲခြေတောက်ပြုတ်၊ ဖြူဂျီးဖူးသုတ်နဲ့
ထမင်းလုပ်ကို ဘယ်နတ်သုဒ္ဓါနဲ့မှ မလဲဖူး။ ကောင်းမှကောင်း။
ကျနော်တို့အစောပိုင်းက တလကျော်ကျော်အသားမစားရတော့ သွေးသားအလိုနဲ့.. စိတ်ကပါ အသားဓာတ်ကို တောင်းလာတာ သတိထားမိလာတယ်။
တခါတော့ တပ်ထဲက ခွေးတကောင်ကျနော်တို့တောင်ကုန်းပေါ် တက်လာတယ်။ စိတ်ကအကောင်မြင်တာနဲ့ သတ်စားချင်စိတ်က ပေါ်နေတယ်။
ဒါနဲ့ခွေးလည်း စခန်းနားရောက်လာရော“လိုက်ဟ..လိုက်ဟ..
လိုက်ဟ”ဆိုပြီး ၀ိုင်းလိုက်တာ..။ ဘယ်မိမလဲ။ ခွေးက ကိုယ့်ထက်လျှင်တာပေါ့။ သူလည်း စားကြွင်းစားကျန် ရမလားဆိုပြီး နယ်မြေအသစ်ကို သတိနဲ့ချည်းကပ်လာတာ။ ကိုယ့်လူတွေ သံကုန်ဟစ်တာနဲ့ အသက်လုပြီးပြေးတာပေါ့။. ခွေးပြေး..ပြေးတယ်ဆိုတာ ကွက်တိ။
ကျနော်တော့ အဲဒီတောင်ကုန်းမှာ မြွေသားကိုစပြီး စားဖူးတာပဲ။ တနေ့ကျတော့ ရေချိုးသွားရင်း
ကသဲစစ်သားတချို့ မြွေသတ်ပြီး လွှင့်ပစ်မယ်လုပ်တော့ ကျနော်တို့ထဲက ရဲဘော်တယောက်က
တောင်းယူလာတယ်။ ကသဲကမေးတော့ သိတ်စားလို့ကောင်းတယ်။ ဆေးဘက်ဝင်တယ်လို့
ပြောတယ်။
မြွေအရေခွံခွါပြီး ဆီအိုးကပ်လေးနဲ့ကျော်စားတာ ကောင်းမှကောင်း။ နောက်တော့ ကသဲတွေမြွေရပြီဆို တုတ်ကလေးနဲ့ကလော်ပြီး ကျနော်တို့ကိုလာ..လာပေးတယ်။
မြွေမြင်ရင်လန့်တတ်တဲ့ ကျနော်ကိုယ်တိုင် နောက်ဆို အပြင်ထွက်တိုင်း တုတ်ကိုင်ပြီးမြက်ခင်းပဲကြည့်လျှောက်တော့တာ။ မြွေတွေ့လို တွေ့ငြားပေါ့။
ဒီလိုနဲ့ ပြောက်ကျားရဲဘော်တွေ ရှာစားတတ်လာတယ်။ တောထဲမှာ ပုဇင်းရင်ကွဲတွေ အရမ်းပေါတယ်။ တကျီကျီနဲ့ သိတ်နားညီးတယ်။ နှိမ်နင်းရမယ်ပေါ့။ ဒါနဲ့ ကလေးမြို့ကတောကြွမ်းတဲ့
ဝင်းကိုတို့ အုပ်စုတီထွင်တဲ့နည်းအတိုင်း ဖိနပ်စုတ်တွေကို မီးရှို့၊ ဓာတ်ဆီစိမ်(ကသဲစစ်သားတွေဆီက ဓာတ်ဆီနည်းနည်းတောင်း)ပြီး ကော်လုပ်တယ်။ ၀ါးရှည်ရှည်ထိတ်မှာ ဖိနပ်ကော်ကိုကပ်ပြီး ပုဇင်းရင်ကွဲတွေ ရှာဖမ်းတော့တာပဲ။ သိတဲ့အတိုင်း ပုဇင်းရင်ကွဲဆိုတာ တကျီကျီညံပေမဲ့ လူသံကြားရင်၊ အနားကပ်လာရင် အသံပျောက်သွားတာ၊ ရှာမရဖူး။ သူ့ကိုယ်ရောင်နဲ့ပင်စည်နဲ့က တထပ်တည်း။ ရှာရတာ ဘယ်လွယ်လိမ့်မလဲ။ ဒါပေမဲ့ ပြောက်ကျားတွေက သဲကြီးမဲကြီးပြူးပြဲရှာတာ။ တခါသွားဖမ်းပြီးရင် ပုဇင်းရင်ကွဲတွေ စခန်းတခုလုံးတောင် စားနိုင်တယ်။ နောက်ထပ် အင်းဆက်စစ်ဆင်ရေးတခုက ခါကျဉ်နီအော်ပရေးရှင်း။
သစ်ကိုင်းဖျားတွေမှာ သစ်ရွက်တွေစုပြီး အထုတ်လိုက်ကြီးအုံဖွဲ့နေတဲ့ ခါကျင်တွေရဲ့အကိုင်းကို ဒါးနဲ့ခုတ်ဖြတ်ပြီး ရေဖြည့်ထားတဲ့ ရေပုံးထဲထည့်ထားလိုက်တာ။ ခါကျဉ်ခေါပဏီတပ်ကြီး ကစဉ့်ကလျားဖြစ်တော့ ရေပုံးဆွဲပြန်။ ခါကျဉ်ဥနဲ့အကောင်ပေါက်တွေက ချဉ်တင်တင်လေးအရသာ။ ကျနော်တို့က ကြော်စားတယ်။ ပြောက်ကျားတွေရဲ့ ဗီတာမင်စီပေါ့။ တနေ့ကျတော့ ရဲဘော်တချို့စခန်းနားက သစ်မြစ်ကြီးကို ညာသံပေးပြီး တူးဆွနေကြတယ်။ ဘာတွေ့လို့လဲ မေးကြည့်တော့ ကြွက်တကောင်ဝင်သွားလို့တဲ့ ကျနော်လည်း မြေကြွက်ဆူဆူဖြိုးဖြိုးကြီးစား ရတော့မယ်ဆိုပြီး လုပ်အားပေးလိုက်သေးတယ်။ နောက်ဆုံးတော့ နှစ်ကျပ်ခွဲသားလောက်ရှိတဲ့ ကြွက်ကလေးတကောင် ဖြစ်နေတယ်။ နောက်ထပ်ဖြစ်ရပ်တခုက အတော်ဆိုးတယ်။
ပုတ်သင်ညိုတကောင်ကို ၀ိုင်းလိုက်တာ။ အပင်ပေါ်တက်ပြေးတော့ အပင်ပါလှဲမယ်လုပ်လို့ မနည်းတားရတယ်။ နောက်ဆုံးပုတ်သင်ညိုလည်း ပြောက်ကျားအစာဖြစ်ရတာပဲ။
ပုတ်သင်ညိုမီးဖုတ်စားတာ အရသာက ချိုတယ်။ ဒါပေမဲ့ အသားကနည်းတယ်။ နံကြားကပ်နေတဲ့ အသားစနည်းနည်းလေးကို လုယက်စားကြတာ။ ကျနော်တို့တတွေ အဲလိုဘ၀ကို အဲဒီတခါပဲ ကြုံဖူးတယ်။ ဒါပေမဲ့ နောက်ပိုင်းကျတော့်လည်း တလ၂ခါတော့ အသားစားရပါတယ်။ တော်လှန်နယ်မြေဖြစ်ပေမဲ့ သေးငယ်တဲ့ စိတ်ကလေးတွေနဲ့ အလိုမပြည့်နိုင်တဲ့ စရိုက်တချို့လည်း တွေ့ရတတ်တယ်။ လူပီသတဲ့ လူ့စရိုက်လို့ပဲပြောရမလားပဲ။ ရီစရာလေးတခုပါ။ အသားဟင်းချက်ရင် လူတွေက သူ့အသားကျကြီးတယ်၊ ငါ့ကျတော့ သေးသေးလေးပဲပေးတယ်တို့၊
အသားတုံးဖျက်တာ အတုံးမညီဖူးတို့ ဝေဖန်လွန်းလို့ အသားတုံးအကြီးအသေး မျှတအောင် အပ်ချည်ကြိုးလေးတွေနဲ့ တွဲချီထားပြီး ချက်တာ။ ရွှေဥာဏ်တော်စူးရောက်သူတွေ ဖြေရှင်းပုံလေးကို သဘောကျလို့ပါ။ အဲလိုမှ မရှင်းလဲ ပူညံပူညံအစ်ရှုးတွေက တက်လာအုံးမယ်။
ထမင်းစားရင် အမဲတုံးလေးတွေက အပ်ချီကြိုးတန်းလန်းလေးတွေနဲ့။
တရက်မှာ ကံကောင်းချင်တော့ ကြောင်လျှာသီးပင်တပင် ဂေါ်ရခါးကုန်းမှာ သွားတွေ့တယ်။ ကြောင်လျှာသီးတွေ ပြွတ်နေတာပဲ။ မဏိပူရလူမျိုးတွေနဲ့၊ အိန္ဒိယကဇိုမီး၊ မီဇိုချင်းတွေ ကြောင်လျှာသီး မစားတတ်ဖူး။ ဗမာတွေလာမှ စားရကောင်းမှန်းသိတာ။
နောက်ဆို ကြောင်လျှာသီး မကြာမကြာစားရတယ်။ တခါတော့ စခန်းသစ်အောက်က ၀ါးရုံပင်ကနေ ၀ါးမျှစ်စို့တွေ တွေ့လို့ရဲဘော်တွေ ချိုးလာတယ်။ သိတ်စားလို့ကောင်းတယ်။ မျှစ်ချဉ်တောင်တည်လိုက်သေးတယ်။ သိတ်မကြာဖူး။ ကသဲ ရဲအရာရှိနဲ့ အရပ်သားတယောက် စခန်းပေါ်ရောက်လာတယ်။ ပါလာတဲ့ အရပ်သားက သူ့ရဲ့ဝါးရုံတောက မွေးထားတဲ့ဝါးတွေကို ဒီကဗမာတွေ ခိုးနှုတ်သွားတဲ့ အကြောင်းတိုင်ပြောတာ။ ဒီမျှစ်ကနေ ၀ါးဘယ်လောက်ထွက်နိုင်ကြောင်း၊ ၀ါးတလုံးကို ဘယ်လောက်တန်ဘိုးကြီးကြောင်း တွက်ချက်ပြီးရော်ကြေးတောင်းလို့ စခန်းက မရှိမဲ့ရှိမဲ့ အလှုငွေတချို့ ပေးလျော်လိုက်ရတယ်။
ကျနော်တို့ထဲက ပြောက်ကျားတပ်မှုးကြီး ကိုဘရမ်(ကိုသိန်းဌေး၊နယူးရောခ်)က ဟင်းချက်ကောင်းရုံတင်မကဖူး၊ လက်သမားအလုပ်၊
လက်နက်ဆင်တဲ့အလုပ်တွေပါ ကျွမ်းတယ်။ တရက်တော့ ဘယ်ကသစ်သားတွေ သားရည်ပင်တွေရလာလည်းမသိဖူး ဒူးလေးတလက် ကျကျနနလုပ်တော့တာပဲ။
သူ့ဒူးလေးက သိတ်ကောင်းတယ်။ သန်တယ်။ ကျနော်တို့အားနဲ့ဆွဲပြီး မောင်းမတင်နိုင်ဖူး။
ကိုဘရမ်က ထောင်ထောင်မောင်းမောင်း၊ အသားဖြူဖြူ(ဂျူးကပြား)၊အားတောင့်တယ်။ သူ့ဒူးလေး သူတယောက်ထဲ ကိုင်နိုင်တယ်။
ကိုဘရမ်ဒူးလေးကိုင်ပြီးတောထဲသွားရင် ကျနော်တို့တတွေက “ကိုဘရမ် ယုန်ပါလာမလား၊ ဂျီပါလားမလား”
“မဆလာထောင်းထားမယ်၊ ငြုပ်သီးထောင်းထားမယ်”ဆိုပြီး စနောက်လေ့ရှိတယ်။
သူ့ကိုကျနော်တို့ငယ်ငယ်ကဖတ်တဲ့ ကာတွန်းမောင်စိန်ရဲ့ “မုဆိုးကြီးလုံန္ဒကိ”ဆိုပြီး စနောက်ခေါ်လေ့ရှိတယ်။
သူပြန်လာရင်လည်း “တောက်နာတယ်ကွာ ဂျီပေါက်လေးတကောင်နီးနီးလေးပဲ ဒူးလေးမောင်းတင်တုံးပြေးသွားတာ”တို့၊
“မျောက်တွေကွာ အုပ်လိုက်ကြီး၊ ရှိုထဲဆင်းပြေးတာမမိလိုက်ဖူး” ဘာညာနဲ့ညီးပြလေ့ရှိတယ်။ ပြီးတော့ အမဲလိုက်ပြီးပြန်လာတိုင်း သူ့လက်ထဲအမြဲတမ်းပါလာလေ့ရှိတာက
“မြင်းခွါရွက်”တွေချည်းပဲ။ ဒေါက်တာအောင်ကျော်ဦးက သူဒူးလေးကိုင်ပြီးတောထဲထွက်တိုင်း
“ကိုဘရမ်..မြင်းခွါရွက်တွေ..ပိုခူးခဲ့နော်”လို့ နောက်ပြောင်လေ့ရှိတယ်။
ကျနော်တို့စခန်းမှာ အမြဲတမ်းသရေစာလို မပြတ်စားလေ့ရှိတာက “စကပ်သီး”ပဲ။ စကပ်ပင်က နေရာအနှံ့တောထနေတာ။
စကပ်သီးက ကြိမ်သီးအသေးစားနဲ့တူတယ် ။သေးသေးလုံးလုံး။ မီးဖုတ်ပြီးအထဲက အဆံကိုစားတာ နည်းနည်းစိမ့်တယ်။ ကြာကြာစားလို့ မကောင်းဖူး။ ဖန်လာတယ်။ လျှာတွေဖွယ် လာတယ်။ ဒါပေမဲ့ ၀ိုင်းဖွဲ့မီးလှုံရင်း ဟိုပြောဒီပြောနဲ့ စကပ်သီးလှော်စားရတာ သတိတရပဲ။ ကိုအောင်ကျော်ဦး (ကဗျာမြတ်ထက်)ကတောင် ကဗျာတပုဒ်စပ်ထားသေးတာ အဲဒီတကြောင်း
မှတ်မိနေတယ် “စကပ်သီးရလို့..လှော်စဉ်မှာ၊ ငတ်ကြီးကျတို့ပျော်ရွှင်စရာ”ဆိုတာလေး။
တချိန်က ကျနော်တို့ပြောက်ကျားရဲဘော်တွေ အဲဒီလို..တောထဲက အဟာရတွေနဲ့ ကြံဖန်စားကြ၊ ပြောင်ကြစကြရင်း ငြီးငွေ့စရာ၊ စိတ်ပျက်စရာကောင်းတဲ့ ဘ၀တွေကို နှစ်သိမ့်ပြီးကျော်ဖြတ်ခဲ့ကြတယ်။
“ငါတို့ ရန်သူ့လက် အောက်ခေါင်းလျှိုမ၀င်ပဲ ဒီနေရာမှာ တရက်တစက္ကန့်ပိုနေနိုင်ရင်..
တရက်တစက္ကန့်ပိုအသက်ရှည်ရင်တောင် ရန်သူကို တရက်တစက္ကန့်ကြာ တော်လှန်နေတာပဲဖြစ်တယ်”
“ကိုယ်က ဘာမှမလုပ်နိုင်သေးတောင် နယ်စပ်မှာ ကြံ့ကြံ့ခံရပ်တည်နေတာကိုက
ရန်သူကို အာခံတာ၊ တော်လှန်တာဖြစ်တယ်”ဆိုတဲ့ အယူအဆတွေနဲ့ ကိုယ့်ဖာသာ စိတ်ဖြေနေခဲ့ကြတယ်။
ကျနော်လည်း ရှားရှားပါးပါးဒုက္ခသည်စခန်းမှာရှိနေတဲ့ ဂစ်တာအစုတ်လေးတလက်ကိုတီးပြီး
ကျော်ဟိန်းရဲ့“ထာဝရရှင်သန်နေမယ်”ဆိုတဲ့ သီချင်းကို စာသားပြင်ပြီး မကြာခဏ အော်ဆိုလေ့ရှိတယ်။
“ဟောဒီ လေထန်တောင်ကုန်းကြီးမှာ အာလူးနဲ့ပဲ ရှိနေသရွေ့ ထာဝရရှင်သန်နေမယ်ဟေ့
ထာဝရရှင်သန်နေမယ်…”
ကိုညို
(၃၀-ဇန်န၀ါရီ၂၀၁၃)
0 comments:
Post a Comment