ဒေါ်အောင်ဆန်းစုကြည် အယူခံ အမိန့်ချမှတ်မည့်ရက် ရွှေ့ဆိုင်း

ဧရာဝတီ၊ စက်တင်ဘာလ ၁၈ ရက် ၂၀၀၉

မြန်မာ့ဒီမိုကရေစီ ခေါင်းဆောင် ဒေါ်အောင်ဆန်းစုကြည်၏ အယူခံကို အောက်တိုဘာလ ၂ရက်နေ့တွင် အမိန့် ချမှတ်မည်ဟု ရှေ့နေဖြစ်သူ ဦးဉာဏ်ဝင်းက ဧရာဝတီသို့ ပြောသည်။

ယင်းအယူခံကို ယနေ့ နံနက် ၁၀ နာရီမှ စတင်ကြားနာခဲ့ပြီး ညနေ ၃ နာရီကျော်တွင် ပြီးဆုံးခဲ့ကြောင်းသိရသည်။

“အယူခံ အကြောင်းပြချက်တွေကိုပဲ လျှောက်လဲချက်ပေးကြတာပဲ၊ ဟိုဘက်ကလည်းပေးတယ်၊ ကျနော်တို့ဘက် ကတော့ ဦးကြည်ဝင်းက လျှောက်လဲချက်ပေးတယ်၊ သူ့ လျှောက်လဲချက်က ၂ နာရီခွဲ ကြာပါတယ်၊ အောက်တိုဘာ ၂ရက်နေ့မှာ အမိန့်ချဖိ်ု့ ချိန်းလိုက်ပါတယ်” ဟု ဦးဉာဏ်ဝင်းက ပြောသည်။

ဒေါ်အောင်ဆန်းစုကြည်နှင့် ထပ်မံတွေ့ဆုံရန်အတွက် ယခုလောလောဆယ်တွင်မူ အစီအစဉ် မရှိသေးကြောင်း၊ ဥပဒေရှုထောင့်မှ ကြည့်ပါက အမှု အခြေအနေမှာ ကောင်းမွန်ကြောင်း၊ လွတ်မြောက်ရန် မျှော်လင့်နိုင်ကြောင်း ၎င်းကဆိုသည်။

ယင်းအယူခံ ကြားနာရာသို့ အာဏာပိုင်များက ဒေါ်အောင်ဆန်း စုကြည်အား ကိုယ်တိုင် တက်ရောက်ခွင့် မပြုကြောင်း သိရသည်။

အယူခံလွှာတွင် ဥပဒေကြောင်းဆိုင်ရာ အချက် ၁၁ ချက်ပါဝင်ပြီး၊ ၁၉၇၄ ခုနှစ် အခြေခံ ဥပဒေဆိုင်ရာ နှင့် ဥပဒေ အဓိပ္ပာယ်ဖွင့်ဆိုချက်များ ပါဝင်သည်ဟု သိရှိရသည်။

ဒေါ်အောင်ဆန်းစုကြည်၏ အယူခံကို ရန်ကုန်တိုင်း တရားရုံးက စက်တင်ဘာ ၄ ရက်နေ့ တွင် လက်ခံခဲ့ပြီး လျှောက်လဲချက် ကြားနာရန် ယနေ့ နံနက် ၁၀ နာရီတွင် ရုံးချိန်းပေးထားခြင်းဖြစ်သည်။

ဒေါ်အောင်ဆန်းစုကြည် အယူခံ ကြားနာသည့် ယနေ့သည် စစ်အစိုးရ အာဏာသိမ်းသည့် ၂၁ နှစ်ပြည့် မြောက်သော နေ့နှင့်တိုက်ဆိုင်နေသကဲ့သို့ အကျဉ်းသား ၇၁၁၄ဦးကို စစ်အစိုးရက လွတ်ငြိမ်း ချမ်းသာခွင့် ပေးလိုက်ကြောင်း အစိုးရပိုင်သတင်းစာများတွင် ဖော်ပြချက်နှင့်လည်း တိုက်ဆိုင်နေသည်။

ဒေါ်အောင်ဆန်းစုကြည်ကို ပြီးခဲ့သော သြဂုတ်လ ၁၁ရက်နေ့တွင် တိုင်းတရားရုံးက နေအိမ် အကျယ်ချုပ် ၁နှစ်ခွဲ ချမှတ်ခဲ့သည့် အပေါ် ယခုကဲ့သို့ အယူခံဝင်ခြင်း ဖြစ်သည်။

ဒေါ်အောင်ဆန်းစုကြည်သည် မေလအတွင်း ၎င်း၏နေအိမ်သို့ တိတ်တဆိတ် ဝင်ရောက်ခဲ့သော အမေရိကန် နိုင်ငံ သား ဂျွန် ဝီလျံ ယက်ထော ကြောင့် ရုံးတင်တရားစွဲခံခဲ့ရခြင်းဖြစ်သည်။

ထိုအမှုတွင် အင်းစိန်ထောင်တွင်း အထူးတရားရုံးက ဒေါ်အောင်ဆန်းစုကြည်ကို ထောင်ဒဏ် ၃ နှစ် ချမှတ်ခဲ့ သည်။ သို့သော် စစ်အစိုးရ ခေါင်းဆောင် ဗိုလ်ချုပ်မှူးကြီး သန်းရွှေ၏ အမိန့်ဖြင့် ကျခံရမည့် ထောင်ဒဏ်ကို ထက်ဝက် လျှော့ချကာ ဆိုင်းငံ့ ပြစ်ဒဏ် နေအိမ် အကျယ်ချုပ် ၁ နှစ်ခွဲ စီရင်ချက် ချမှတ်ခံခဲ့ရသည်။

ပြစ်ဒဏ်လျှော့ပေါ့ရခြင်း အကြောင်းအရင်းမှာ ဒေါ်အောင်ဆန်းစုကြည်သည် ဗိုလ်ချုပ်အောင်ဆန်း၏ သမီး ဖြစ်၍ လည်းကောင်း၊ ရပ်ရွာ အေးချမ်း သာယာရေးနှင့် တည်ငြိမ်ရေးကို ရှေးရှု၍ လည်းကောင်း၊ အာဃာတ မရှိစေရေး အတွက် လည်းကောင်း၊ ဒီမိုကရေစီ လမ်းကြောင်းတွင် အနှောင့်အယှက် မဖြစ်စေရေးအတွက်လည်းကောင်း ဖြစ်သည်ဟု ဆိုသည်။

ဒေါ်အောင်ဆန်းစုကြည်သည် ၂၀၀၃ ခုနှစ် မေလတွင် ဖြစ်ပွားခဲ့သော ဒီပဲယင်းအကြမ်းဖက်တိုက်ခိုက်မှု အပြီးမှ စတင်၍ နေအိမ် အကျယ်ချုပ်ဖြင့် အထိန်းသိမ်းခံနေရသည့် ၆ နှစ်ပြည့်ခါနီး အချိန်တွင် ယခုကဲ့သို့ တရားစွဲဆို ခံရခြင်း ဖြစ်သည်။ ၁၉၈၉ ခုနှစ်မှ စ၍ နေအိမ် အကျယ်ချုပ် ဘ၀ဖြင့် နေရချိန် စုစုပေါင်း ၁၃ နှစ်ကျော်ပြီ ဖြစ် သည်။