ဆက်တိုက်ဖမ်းဆီးမှုများကို ၈၈ ကျောင်းသားများရှုံ့ချ

ဧရာဝတီ-ကိုသက်|စက်တင်ဘာ ၁၅၊ ၂၀၀၈

၈၈ မျိုးဆက်ကျောင်းသူ မနီလာသိန်းအပါအ၀င် ယုံကြည်ချက်ကြောင့် နိုင်ငံရေးလှုပ်ရှားသူများအား မတရားဖမ်းဆီးမှုများ သည် အမျိုးသားပြန်လည်သင့်မြတ်ရေး မရနိုင်သည့်အပြင် ပိုမိုရှုပ်ထွေးသည့် ပြဿနာများ ပေါ်ပေါက်စေနိုင်သည်ဟု ၈၈ မျိုးဆက်ကျောင်းသားအဖွဲ့က ယနေ့ပြောဆိုလိုက်သည်။

၈၈ မျိုးဆက်ကျောင်းသားအဖွဲ့၏ ပြောရေးဆိုခွင့်ရှိသူ ကိုထွန်းမြင့်အောင်က “ဒီမိုကရေစီစနစ်တခုကိုသွားတဲ့ နေရာမှာ ကိုယ်နဲ့သဘောထားကွဲလွဲသူတွေကို ထောင်ထဲမှာ အတင်းသော့ခတ်ထားလို့ မရပါဘူး။ ဒီမိုကရေစီ ခရီးလမ်းဆိုတာ တွေ့ဆုံဆွေးနွေးရေးစားပွဲဝိုင်းကတဆင့် ငြိမ်းချမ်းစွာလျှောက်လှမ်းရမယ့် လမ်းဖြစ်ပါတယ်” ဟု ဧရာဝတီကို ပြောသည်။

မနီလာသိန်းအပါအ၀င် ယုံကြည်ချက်ကြောင့် နိုင်ငံရေးတက်ကြွလှုပ်ရှားသူများ ကို အာဏာပိုင်များက မတရားဖမ်းဆီးမှုများ ဆက်လက်လုပ်ဆောင်နေသော် လည်း မိမိတို့၏ယုံကြည်ချက်ဖြစ်သော ဒီမိုကရေစီနှင့် လူ့အခွင့်အရေး လှုပ်ရှား ကြိုးပမ်းမှုများမှာ နောက်ဆုတ်သွားမည်မဟုတ်ကြောင်း ၈၈ မျိုးဆက် ကျောင်းသားအဖွဲ့က ယနေ့ထုတ်ပြန်လိုက်သည့် ကြေညာချက်တွင် ဖော်ပြထားသည်။

မနီလာသိန်းအပါအ၀င် နိုင်ငံရေးအကျဉ်းသားများအား ညှဉ်းပန်းနှိပ်စက်မှုများ မပြုလုပ်ရန် ၈၈ မျိုးဆက် ကျောင်းသားအဖွဲ့က တောင်းဆိုထားပြီး အဖမ်းခံထားရသူများ၏ အသက်နှင့်ခန္ဓာ တစုံတရာ ထိခိုက်ခဲ့ပါက စစ်အစိုးရတွင် လုံးဝတာဝန်ရှိသည်ဟု ကြေညာချက်တွင် ထည့်သွင်းဖော်ပြထားသည်။

မနီလာသိန်းသည် လွန်ခဲ့သည့်နှစ် သြဂုတ်လက ရန်ကုန်မြို့တွင်ပေါ်ပေါက်ခဲ့သည့် လောင်စာဆီဈေးနှင့် ကုန်ဈေးနှုန်း ကျဆင်းရေး လမ်းလျှောက်ဆန္ဒဖော်ထုတ်ပွဲများကို ဦးဆောင်ခဲ့သဖြင့် စစ်အစိုးရ၏ လိုက်လံ ဖမ်းဆီးမှုမှ ရှောင်တိမ်းနေခဲ့သူ ဖြစ်သည်။

မနီလာသိန်း၏ ခင်ပွန်းဖြစ်သူ ကိုဂျင်မီ (ခ) ကိုကျော်မင်းယုသည်လည်း ၈၈ မျိုးဆက် ကျောင်းသားခေါင်းဆောင် တဦး ဖြစ်ပြီး လွန်ခဲ့သည့်နှစ် သြဂုတ်လကတည်းက တခြားကျောင်းသားခေါင်းဆောင်များနှင့်အတူ အဖမ်းခံခဲ့ရသည်။ အသက် တနှစ် လေးလသာရှိသေးသည့် မနီလာသိန်းနှင့် ကိုဂျင်မီတို့၏သမီးငယ် ဖြူနေကြည်မင်းယုသည် လေးလသမီးအရွယ် ကတည်းက မိဘများနှင့် နေထိုင်ခွင့်မရခဲ့ပေ။

“မနီလာသိန်းဟာ အတော့်ကို ခံနိုင်ရည်ရှိတဲ့ အမျိုးသမီးတယောက် … ဒါပေမယ့် ကျနော်တို့ မြင်ရတဲ့ အခြေအနေကတော့ စိတ်မချမ်းမြေ့စရာပါ။ ကျနော်တို့လို လူလွတ်တွေတောင် အခုလိုအခြေအနေမှာ လုပ်ကိုင်ရတာ လွယ်တာမဟုတ်ဘူးလေ … သူ့လိုမိခင်တယောက်၊ လင်ယောက်ျားကလည်း ထောင်ထဲမှာ၊ သမီးလေးနဲ့ကလည်း တကွဲတပြားဆိုတော့ သူ့ဒုက္ခက တော်တော်ကြီးပါတယ်” ဟု ကိုထွန်းမြင့်အောင်က ပြောသည်။

ကိုထွန်းမြင့်အောင်သည်လည်း လွန်ခဲ့သည့် စက်တင်ဘာလ သံဃာ့လှုပ်ရှားမှုများ စတင်သည့်ကာလကတည်းက စစ်အစိုးရ ၏ မတရားလိုက်လံဖမ်းဆီးမှုကြောင့် ပုန်းရှောင်နေရင်း လှုပ်ရှားမှုများကို ဆက်လက်လုပ်ကိုင်နေသူ ဖြစ်သည်။

“တခါတလေ သူနဲ့အဆက်အသွယ်ရတုန်း ကျနော်တို့ပြောဖြစ်ကြတာတွေရှိတယ်။ … လူသားတယောက် အနေနဲ့ မေးဖူးတာ ရှိတယ်။ သူပြောတာက မိသားစုတကွဲတပြားဖြစ်နေတာ ဘယ်လိုဖြစ်ချင်မှာလဲပေါ့၊ မိခင်ဘ၀နဲ့ ဒီလိုဒုက္ခတွေခံစားနေရတာ သူတယောက်တည်းမဟုတ်ဘူးပေါ့။ မိဘပေါင်းများစွာက ဒုက္ခတွေကိုခံစားခဲ့ကြတာ အနှစ် ၂၀ ရှိပြီ .. ဒီလိုအဖြစ်ဆိုးတွေနိဂုံး ချုပ်နိုင်ဖို့ ကျမတို့ဆက်ပြီး ဒုက္ခခံရမှာလို့ သူကျနော့်ကို ပြောဖူးတယ်” ဟု ကိုထွန်းမြင့်အောင်က မနီလာသိန်းပြောသည်ကို ပြန်ပြောသည်။

၈၈ မျိုးဆက် ကျောင်းသားအဖွဲ့မှ ကိုအံ့ဘွယ်ကျော်၏ အမေဖြစ်သူ ဒေါ်တင်တင်ဝင်းကိုလည်း မနီလာသိန်းနှင့် ဆက်စပ်၍ လွန်ခဲ့သည့် ၁၁ ရက်နေ့တွင် အာဏာပိုင်တို့က ခေါ်ယူစစ်ဆေးခဲ့သည်ဟု နိုင်ငံရေးအကျဉ်းသား မိသားစုဝင်များက ဧရာဝတီ ကို ပြောသည်။
ရန်ကုန်မြို့ ရန်ကင်းမြို့နယ်တွင်နေထိုင်သူ ဒေါ်တင်တင်ဝင်းသည် အသက် ၇၅ နှစ်ကျော်ရှိပြီဖြစ်ပြီး လွန်ခဲ့သည့်နှစ် သြဂုတ် လအတွင်းက သားဖြစ်သူ ကိုအံ့ဘွယ်ကျော်သည် ကိုဂျင်မီအပါအ၀င် ၈၈ မျိုးဆက်ကျောင်းသားခေါင်းဆောင်များနှင့်အတူ အဖမ်းခံခဲ့ရသည်။