ဧရာဝတီ | မေ ၃၊ ၂၀၀၈
ယနေ့နံနက် အစောပိုင်း တိုက်ခတ်သော မုန်တိုင်းဒဏ်ကြောင့် ရန်ကုန်မြို့နှင့် ဧရာဝတီတိုင်းရှိမြို့များ ထိခိုက် ပျက်စီးမှု ကြီးမားကြောင်း စုံစမ်းသိရှိရသည်။ တိုက်ခတ်သော မုန်တိုင်းမှာ ၁ နာရီ မိုင် ၁၂၀ နှုန်း ရှိသည်။
နာဂစ်မုန်တိုင်း မြန်မာပြည်သို့ ဝင်ရောက်တိုက်ခတ်နေစဉ် (Photo: US Navy)ကုလသမဂ္ဂ သတင်းရပ်ကွက်များ၏ အဆိုအရ နာဂစ်အမည်ရှိ မုန်တိုင်းသည် သောကြာနေ့ ညလယ်အချိန်တွင် မြန်မာပြည် ကမ်းရိုးတမ်းရှိ လပွတ္တာမြို့သို့ စတင်ဝင်ရောက်ခဲ့ပြီး နံနက် ၅ နာရီခွဲတွင် အပြင်းထန်ဆုံး အရှိန်အဟုန်ဖြင့် ရန်ကုန်မြို့သို့ တိုက်ခတ်ခဲ့သည်။
“မုန်တိုင်းက မနေ့ည ၁၁ နာရီက စတိုက်တယ်၊ ၁ နာရီက စပြီး ပြင်းပြင်းထန်ထန်တိုက်တာ အပြင်းဆုံးအချိန်ကတော့ မနက် ၅ နာရီ၊ ၆ နာရီ ထင်တာပဲ၊ အိမ်တအိမ်လုံးရေတွေထဲ မှာ၊ မနက် ၇ နာရီ လောက်မှာ သွပ်မိုး လန်သွားတာ၊ တညလုံးလည်း မအိပ်ရဘူး၊ စလောင်းတွေ အားလုံးလည်း လွင့်၊ ကားတွေက လမ်းမကြီးတွေမှာ တောင် ရှောင်သွားနေရတယ်၊ သစ်ပင်တွေ လည်းကျိုး၊ သစ်ပင်တွေကုန်ပြီ၊ လူအသေ အပျောက်ကတော့ အတိ အကျ မသိနိုင်သေးဘူး၊ မနက် ၁၁ နာရီခွဲလောက်မှာ တော့လေရပ်သွားတယ်” ဟု ရန်ကုန်မြို့ ဗိုလ်တထောင်မြို့ နယ်တွင် နေထိုင်သည့် သတင်းထောက် တဦးက ပြောသည်။
ယခုအချိန်အထိ အသေအပျောက် စာရင်းအတိအကျကို မသိရှိရသေးသော်လည်း အေပီ သတင်း တပုဒ်၏ အဆိုအရ ရန်ကုန်မြစ်ကို ဖြတ်ကူးသော အမျိုးသမီး ၃ ဦး လေပြင်းမုန်တိုင်းဒဏ်ကြောင့် လှေမှောက်သေဆုံးသည် ဟု သိရသည်။
ဆင်ဟွာ သတင်း တပုဒ်က ရန်ကုန်မြို့တဝန်း သစ်ပင်ကြီးများ ပြိုလဲမှုကြောင့် လမ်းများ ပိတ်ကုန်ပြီး လမ်းများပေါ်တွင်ရပ် ထားသော ကားများစွာမှာလည်း သစ်ပင်များ ပိလျှက်ရှိကြောင်း၊ လျှပ်စစ်မီးနှင့် တယ်လီဖုန်း လိုင်းများ ပြတ်တောက်ကုန် ကြောင်း၊ မိုဘိုင်း လက်ကိုင် ဖုန်းများလည်း ဆက်သွယ်၍မရတော့ကြောင်း၊ ကြော်ငြာဆိုင်းဘုတ် များနှင့် ဂြိုဟ်တုစလောင်း များ အားလုံးနီးပါးမှာ ပြိုကျ ပျက်စီးကုန်ကြောင်း ဆိုသည်။
ရိုက်တာ သတင်းကလည်း မြန်မာ့ရုပ်မြင်သံကြားနှင့် ရန်ကုန် စီးတီး အက်ဖ်အမ် ရေဒီယို ထုတ်လွှင့်မှုများ ရပ်ဆိုင်းကုန် သည်ဟု ဆိုသည်။ ရန်ကုန် မင်္ဂလာဒုံလေဆိပ်ကို ယခုအခါ ပိတ်ထားရကြောင်းလည်း သိရှိရသည်။
ယင်းမုန်တိုင်း ဒဏ်ကြောင့် လျှပ်စစ်မီးလိုင်းများနှင့် တယ်လီဖုန်းလိုင်းများလည်း ပြတ်တောက်ကုန် သည်ဟု အထက်ပါ ရန်ကုန်သတင်းထောက်ကလည်း ပြောသည်။
ရန်ကုန် ကမာရွတ်မြို့နယ် စံရိပ်ငြိမ် ရပ်ကွက်တွင်နေထိုင်သူ တဦးကလည်း ၎င်းတို့နေထိုင်ရာ ရပ်ကွက် တခုလုံး တွင်လည်း မုန်တိုင်းဒဏ်ကြောင့် ထိခိုက် ပျက်စီးမှုများရှိကြောင်း ပြောဆိုသည်။
“မုန်တိုင်းက တော်တော်ဆိုးတယ်၊ တလမ်းမှ မလွတ်ဘူး၊ မှန်တွေကွဲတယ်၊ ခေါင်းမိုးပေါ်တင်ထားတဲ့ စလောင်းတွေ လန်ကုန်ပြီ အောက်ကို ပြုတ်ကျကုန်တယ်၊ ကားတွေပေါ်သစ်ပင်ပိတယ်၊ ကျနော့်ကားလည်းပိတယ်၊ သွပ်ပြားတွေ အချပ် လိုက် လမ်းတွေပေါ်ပြေးနေတယ်”ဟု စံရိပ်ငြိမ်တွင် နေသူက ပြောသည်။
မျက်မြင်တဦးကလည်း ကမာရွတ်၊ လှိုင်၊ မြေနီကုန်း ဝန်းကျင်၊ ရွှေုဂုန်တိုင် ဝန်းကျင်နှင့် တက္ကသိုလ်ရိပ်သာလမ်း ဝန်းကျင်တို့ တွင် သစ်ပင်များလဲကျ၍ လမ်းများပိတ်နေကြောင်း ပြောပြသည်။
ရန်ကုန်လှော်ကား ဘက်တွင် ယင်းမုန်တိုင်းတိုက်ခတ်မှုကြောင့် သစ်ပင်ကြီးများလဲကျပြီး အိမ်ပြိုကျမှုများရှိသည်ဟု လှော်ကားတွင် နေသူတဦးကလည်း ပြောသည်။
“အိမ်အပြင်တောင်ထွက်လို့ မရဘူး၊ လမ်းမှာ သစ်ပင်ကြီးတွေပိတ်နေတယ်၊ အိမ်အမိုးတွေလန်တယ်၊ တချို့ အိမ်ပြိုတယ်”ဟု ၎င်းက ပြောပြသည်။
“ဝေဠုဝန်တိုက်ခန်းတွေမှာ လေးခန်းတွဲ၊ သုံးထပ်တိုက် ဆယ့်ရှစ်လုံးရှိတာ အမိုးတွေအားလုံး လန်သွားတယ်။ ဟံသာဝတီ ကားပွဲစားတန်းဘက်မှာ ကုန်းကျော်လိုက်တာနဲ့ ကျွန်းတောလမ်းလောက်အထိ အပင်ကြီးတွေ လဲနေတယ်။ မီးရထားလမ်း တွေမှာလည်း သစ်ပင်တွေကျိုးပြီးပိတ်နေတယ် … သွားလို့မရဘူး၊ မီးရထားတွေ မထွက်ဘူး” ဟု စမ်းချောင်းမြို့နယ်ရှိ ဒေသခံက ပြောသည်။
ယနေ့ နေ့လယ်ပိုင်းကစ၍ စမ်းချောင်းမြို့နယ်ရှိ အခြေခံပညာအထက်တန်းကျောင်း အမှတ် (၁)၊ အခြေခံပညာ မူလတန်း ကျောင်း အမှတ် (၁၂) နှင့် မူးယစ်ဆေးဝါးပြတိုက်တို့တွင် လေဘေးဒုက္ခသည် ကယ်ဆယ်ရေးစခန်း ဖွင့်လှစ်ထားသည် ဟုလည်း အဆိုပါဒေသခံက ဆိုသည်။
ယင်းမုန်တိုင်းသည် ရခိုင်ပြည်နယ် တောင်ပိုင်း သံတွဲ၊ တောင်ကုတ်၊ ဂွ တို့ကိုလည်း ညဦးပိုင်းတွင် ဖြတ်သွားပြီး အထိအခိုက် ရှိကြောင်း ဒေသခံတဦးက ပြောသည်
နာဂစ် မုန်တိုင်းသည် ဧရာဝတီ တိုင်းရှိ ပုသိမ်၊ မြောင်းမြ၊ လပွတ္တာ၊ မော်လမြိုင်ကျွန်း၊ ကျုံမငေး၊ ဘိုကလေး၊ ချောင်းသာ၊ ငွေဆောင်၊ သာယာဝတီ၊ ဂွ မြို့တို့ကိုလည်း ဝင်ရောက် တိုက်ခတ်ရာ အပျက်အစီး များကြောင်း သိရှိရသည်။ အသေးစိတ် ကိုမူ ဆက်လက် စုံစမ်းနေဆဲဖြစ်သည်။
0 comments:
Post a Comment