Friday, October 14, 2011

“အပြောင်းအလဲဖြစ်ပြီမဖြစ်သေးဘူးဆိုတာ ပြည်သူတွေရဲ့လက်တွေ့ဘဝနဲ့ တိုင်းတာရမှာဖြစ်တယ်”

မောင်ချင့်ချိန်

အမှန်တော့ တောင်ပို့ကြီးမှန်း အစောကြီးကတည်းက မြင်ထားသိထားကြပြီးသားပါ၊ “ဖွတ်ထွက်လာတာ မတွေ့သေးဘူး၊ ဘုရားဖြစ်ချင်ဖြစ်နေမှာ၊ စောင့်ကြည့်ကြသေးတာပေါ့” လို့ ဝေဝါးနေဖို့ကို မလိုတာပါ၊ “သူများလိမ်တာ ခံရတာမျိုးက ပထမတကြိမ်မှာ လိမ်တဲ့သူအမှား၊ ဒုတိယတကြိမ်လည်း လိမ်တဲ့သူအမှားပဲ၊ အခါခါခံရရင်တော့ လိမ်တဲ့သူအမှားထက် အလိမ်ခံနေသူကိုက အလွန်းလို့၊ အသုံးမကျလို့ ဆိုတာမျိုး ခံရသူအမှား” ဆိုတဲ့ ဆိုရိုးစကားဟာ ခေတ်အဆက်ဆက် ခုလိုအခြေအနေမျိုးတွေရှိခဲ့လို့ တင်စားပြောခဲ့ကြတာဖြစ်မှာပါ။

ပြောကြည့်စမ်းပါ၊ စစ်အုပ်စုမှာ ရိုးသားတဲ့လက္ခဏာတွေ၊ တိုင်းပြည်အကျိုးကိုပဲ ဦးစားပေးဆုံးဖြတ်တော့မဲ့အနေအထားတွေ၊ တကယ်ပဲ တွေ့နေရပါပြီလားလို့။ ဒေါ်အောင်ဆန်းစုကြည်နဲ့တွေ့ပြတာ၊ နိုင်ငံရေးအကျဉ်းသား(တချို့)လွှတ်ပြတာ၊ ပြောချင်ရာပြောခွင့်ရထားတဲ့ သတင်းစာတွေ၊ ရုပ်မြင်သံကြားတွေပေါ်ကနေ စကားလုံးလှလှတွေ ရွတ်ပြတာတွေလောက်ကိုကြည့်ပြီး ပြောင်းလဲဖို့လမ်းစမြင်နေရပါပြီ လို့ စစ်အုပ်စုကိုယုံကြည်ရတော့မယောင်ပြောဆိုမှုမျိုး ဘယ်ပြည်သူ့ဘက်တော်သားကမှ ယတိပြတ်ပြောရဲမှာမဟုတ်ပါဘူး ။

“စားဝတ်နေမှုဘဝ ဖူလုံခွင့်ပေးပါ”လို့ ဆန္ဒပြတောင်းဆိုယုံသက်သက်နဲ့ ရက်ရက်စက်စက်ပစ်သတ်ခံခဲ့ရတဲ့ အပြစ်မဲ့ပြည်သူတွေ၊ ကျောင်းသားတွေ၊ ရဟန်းသံဃာတွေကို မေ့ထားလိုက်ကြတော့မလား ။ အကျဉ်းထောင်တွေ၊ တောတောင်တွေထဲ၊ မိတကွဲဖတကွဲ သားတကွဲ မယားတကွဲရောက်ကြရပြီး ဘဝတွေ ထိခိုက်ပျက်ဆီးခဲ့ရသူတွေ ၊ ခြေလက်ခန္ဓာဆုံးရှုံးခဲ့ရသူတွေ၊ အသက်ပါပေးခဲ့ရသူတွေရဲ့ စွန့်လွှတ် အနစ်နာခံမှုတွေက အလကားဖြစ်ရတော့မှာလား။ စစ်ပွဲတွေကြားမှာ အိုးအိမ်စွန့်ခွာ ရှောင်ပုန်းပြေးလွှားပြီး အနာဂတ်မဲ့နေတဲ့ တိုင်းရင်းသားတွေအတွက် ဘယ်လိုအာမခံချက်မျိုးကို ဘယ်သူက ပေးနိုင်ပါပြီတဲ့လဲ။

အစွန်းရောက်လွန်းတယ်လို့ မထင်ပါနဲ့၊ စစ်အာဏာရှင်ခေတ် နှစ်ငါးဆယ်သက်တမ်းမှာ ကျနော်တို့ မမှီခဲ့ပေမဲ့ ကြားရဖတ်ရလို့သိခဲ့ရတဲ့ ၁၉၆၂ ခုနှစ် မတ်လ(၂)ရက်နေ့ကနေ ၁၉၈၈ခုနှစ်ထိ ၂၆ နှစ်စာအခြေအနေတွေနဲ့ ကျနော်တို့ ကောင်းကောင်းမှီပြီး ကိုယ့်တွေခံစားသိမြင် ခဲ့ရတဲ့ ရှစ်လေးလုံးကာလ အပါအဝင်၂၃ နှစ်ကျော်အတွေ့အကြုံတွေက စစ်အုပ်စုကို ဘယ်လိုမှ မယုံကြည်သင့်ဘူးဆိုတာ သတိပေးနေလို့ ပါ ။ 

အာဏာခိုင်မြဲရေးအတွက် မီးစတဘက် ရေမှုတ်တဘက်နည်းကို နေဝင်းလက်ထက်ကတည်းက တွင်တွင်သုံးလာခဲ့တာပါ၊ ပစ်သတ်တယ်၊ ရိုက်နှက်ဖမ်းဆီးတယ်၊ လူမဆန်တဲ့ နှိပ်စက်ညှင်းပန်းမှုတွေလုပ်တယ်၊ ထောင်ချတယ်၊ မိသားစုလိုက်ဘဝပျက်ပြီး နာလန်မထူ နိုင်တော့အောင် နှိပ်ကွတ်တယ်၊ အဲဒီလိုမီးစတဘက်နည်းတွေကို ကျောင်းသားသမဂ္ဂအဆောက်အဦးဖျက်ခဲ့တဲ့ ၆၂ ဆဲဗင်းဂျူလိုင်၊ ၇၄ အလုပ်သမားအရေးအခင်း၊ ၇၄ ဦးသန့်အရေးအခင်း၊ ၇၅ အလုပ်သမားအရေး အခင်းနှစ်ပတ်လည်၊ ၇၆ မှိုင်းရာပြည့် ၊ ၈၈ မတ်လ အရေးအခင်း စတဲ့ အာဏာကို ထိပါးလာတဲ့ ကိစ္စတိုင်းမှာ ရက်ရက်စက်စက် အသုံးပြုခဲ့သလို ပြည်တွင်းငြိမ်းချမ်းရေးဆွေးနွေးဖို့ ကမ်းလှမ်းတာ၊ အထွေထွေ လွတ်ငြိမ်းချမ်းသာခွင့်တွေပေးတာ၊ ၇၄ ဖွဲ့စည်းပုံအခြေခံဥပဒေ ဆန္ဒခံယူပွဲလုပ်ပြီး စစ်ယူနီဖေါင်းတွေချွတ် အရပ်သားအစိုးရ ယောင်ဆောင်ပြတာ၊ ဝန်ထမ်းတွေကိုလစာတိုးပေးတာ၊ ဘုရားတည် ၊ တံတားဆောက် ၊ လမ်းဖေါက်ဆိုတာတွေလုပ်ပြတာ စတဲ့ ရေမှုတ်တဘက် နည်းတွေကိုလည်း တလျှောက်လုံးအသုံးပြုခဲ့တာပါ ။

စစ်အာဏာရှင်မျိုးဆက်တွေအဖြစ် နေဝင်းအမွေကိုဆက်ခံခဲ့တဲ့ စောမောင်၊ ခင်ညွှန့်၊ သန်းရွှေ၊ သိန်းစိန်တို့ လက်ထက်မှာလည်း ဒီနည်း နာတွေကိုပဲ ဆက်သုံးနေတာပါပဲ၊ ၈၈ လူထုအရေးတော်ပုံကြီးနဲ့ ၉၆ - ၉၉ ကျောင်းသားလှုပ်ရှားမှုတွေကို ပစ်ခတ်သတ်ဖြတ်ပြီးဖြိုခွဲတယ်၊ ကျောင်းသားတွေ၊ ကလေးသူငယ်တွေရယ်လို့ ချမ်းသာမပေး၊ သက်ကြီးရွယ်အိုတွေ၊ အမျိုးသမီးတွေ၊ ကိုယ်ဝန်ဆောင်သည်တွေရယ် လို့ မညှာတာ ၊ သံဃာတော်တွေရယ်လို့ အလေးမထားပဲ ရိုက်နှက်ဖမ်းဆီးတယ်၊ လူမဆန်တဲ့နှိပ်စက်ညှင်း ပန်းမှုတွေလုပ်တယ်၊ ထောင်ချတယ်၊ မိသားစုလိုက်ဘဝပျက်ပြီး နာလန်မထူနိုင်တော့အောင်နှိပ်ကွတ်တယ်၊ နေဝင်းလက်ထက်ကအတိုင်း မီးစတဘက်နည်းကိုသုံးတဲ့အပြင် ဒီပဲယင်းလို အောက်တန်းကျတဲ့ လုပ်ကြံသတ်ဖြတ်မှုမျိုးတွေကိ်ုလည်း ကျူးလွန်ခဲ့တယ်၊ ၂၀၀၇ စက်တင်ဘာလို သံဃာတော်တွေရဲ့ မေတ္တာပို့ စီတန်းလမ်းလျှောက် ဆန္ဒထုတ်ဖေါ်မှုမျိုးကို ကမ္ဘာသိပြောင်ပြောင်တင်းတင်း ရိုက်နှက်ဖြိုခွဲတာမျိုး၊ ဘုန်းကြီးကျောင်းတွေ ကို စစ်မြေပြင်မှာရန်သူ့စခန်းတက်သိမ်းသလို ပစ်ခတ်တိုက်ခိုက်စီးနင်းပြီး ချိတ်ပိတ်ခဲ့တာမျိုး၊ ခန်းဂျိနာဂအိလို နိုင်ငံခြားသား သတင်း ထောက်ကိုတောင် ပစ်သတ်တာမျိုး ၊ နေဝင်းခေတ်ထက်တောင် ကြမ်းခဲ့ ရမ်းခဲ့ပါသေးတယ်။

ရေမှုတ်တဘက်နည်းမှာလည်း ရွေးကောက်ပွဲပြီးရင်စစ်တန်းလျားပြန်မှာပါဆိုတာမျိုး လိမ်ညာတာတွေ ၊ အမျိုးသားညီလာခံကျင်းပနေလို့ ပါဆိုတာမျိုး အချိန်ဆွဲတာတွေ ၊ အခွင့်အရေးလေး နည်းနည်းပေးပြီး တိုင်းရင်းသားတချို့ကို အပစ်ရပ်လုပ်ထားတာတွေ ၊ ဝန်ထမ်းတွေကို ခဏခဏလစာတိုးပေးတာမျိုးတွေ ၊ နိုင်ငံရေးအကျဉ်းသားတွေ လွှတ်ပေးပါတယ်ဆိုတာမျိုး လုပ်ပြတာတွေ ၊ စောမောင်လက်ထက်ကနေ သိန်းစိန် လက်ထက်ထိ ဒေါ်အောင်ဆန်းစုကြည်နဲ့ ဆွေးနွေးပါတယ်ဆိုတာမျိုးတွေ ၊ ဖွဲ့စည်းပုံ အခြေခံဥပဒေကို လူထုဆန္ဒနဲ့အတည်ပြုတာ ပါဆိုတာမျိုးတွေ ၊ အကြောင်းကြောင်းကြောင့် နိုင်ငံတကာရောက်နေသူတွေ ပြန်လာဖို့ဖိတ်ခေါ်တယ်ဆိုတာမျိုးတွေ စသဖြင့် နေဝင်းနည်း နာတွေအတိုင်း တထပ်တည်းလိုလုပ်ခဲ့တာပါပဲ ။

နေဝင်းခေတ်မှာ ပထမပိုင်းအတိုက်အခံလုပ်ခဲ့တဲ့ ဝိဒူရသခင်ချစ်မောင်လိုပုဂ္ဂိုလ်မျိုးကို “ဆိုရှယ်လစ် စနစ်နဲ့သာဆိုရင် ခွေးကတက်ကနေ တာဝန်ထမ်းရထမ်းရ”လို့ပြောတဲ့အထိ စည်းရုံးနိုင်ခဲ့သလို သိန်းစိန် ခေတ်မှာလည်း ပထမပိုင်းက “မတရားတဲ့ အမိန့်အာဏာဟူသမျှ တာဝန်အရဖီဆန်ကြ”လို့ ပြောခဲ့တဲ့ ဒေါ်အောင်ဆန်းစုကြည်ကို “တိုင်းပြည်ကောင်းဖို့ဆို အသုံးချခံဖြစ်ချင်လည်းဖြစ်ပါစေ”လို့ ပြောလာတဲ့အထိ စည်းရုံးနိုင်ခဲ့ပါတယ် ၊ နောက်ကျတော့ ပြည်သူတွေက သခင်ချစ်မောင်ကို  ခွေးကတက်ချစ်မောင်လို့ပဲ ခေါ်ကြပါတော့တယ် ။

ဆိုလိုချင်တာက စစ်အာဏာရှင်တွေကိုယုံစားရင် မှားလိမ့်မယ်ဆိုတာပါပဲ ၊ အဲဒီအမှားဟာ တဦးတယောက်ထဲ ထိခိုက်နစ်နာတဲ့ အမှားမ ဟုတ်ပါဘူး ၊ တတိုင်းတပြည်လုံး ဘဝတွေ ၊ အသက်တွေ အများကြီးနဲ့ဆိုင်တာပါ ၊ ဘာနဲ့မှ အလဲအထပ်လုပ်လို့ ၊ အစားထိုးလို့ မရပါဘူး ၊ မှားသွားပါတယ်ဆိုပြီး ကိုယ့်ကိုယ်ကိုယ်သတ်သေပြရဲရင်တောင် ပြည်သူတွေရဲ့ဆုံးရှုံးခဲ့ပြီးတဲ့အခြေအနေတွေက ဘယ်လိုမှပြန်မရနိုင် တော့ပါဘူး ၊ စစ်အာဏာရှင်တွေ ကျူးလွန်ခဲ့တဲ့အပြစ်တွေ ၊ ဗလောင်းဗလဲအကြိမ်ကြိမ်လုပ်ခဲ့တာတွေ ၊ ဘာကိုမှဂရုမစိုက်တတ်တာတွေ ကို အထပ်ထပ်ပြန်သုံးသပ်ပြီး မှန်ကန်လက်တွေ့ကျတဲ့ တိုက်ပွဲဝင်မှုမျိုးကိုရွေးချယ်ကြရမှာပါ ။

နေဝင်းခေတ်ကမှ အထွေထွေလွတ်ငြိမ်းချမ်းသာနဲ့ နိုင်ငံရေးအကျဉ်းသားအကုန်လွတ်ပါသေးတယ် ၊ ခုက နိုင်ငံရေးအကျဉ်းသားတွေ လွှတ်ပေးပါတယ်လို့ ပြောရယုံလေးတင်ပါ ၊ ကျောင်းသားတွေနဲ့ ပြည်သူလူထုကြီးရဲ့ သူရဲကောင်း ၈၈မျိုးဆက်ကျောင်းသားတွေ ၊ ဖေါက် ခွဲရေးပုဒ်မ ၊ အီလက်ထရောနစ်ပုဒ်မ ၊ တရားမဝင်နယ်စပ်ဖြတ်ကျော်မှုပုဒ်မဆိုတာမျိုး တပ်ချင်တဲ့ပုဒ်မတပ်ဖမ်းတာခံထားရတဲ့သူတွေ အများကြီးကျန်နေသေးတာပါ ။ လွတ်ငြိမ်ချမ်းသာကို တနှစ်ထဲပေးလိုက် ၊ ထိုက်သင့်တဲ့အပြစ်ဒါဏ်ခံပြီး ကောင်းကောင်းမွန်မွန်နေတဲ့သူ တွေကိုပေးတယ်လုပ်လိုက်နဲ့ နိုင်ငံတကာအခြေအနေကိုလိုက်ပြီး မီးစင်ကြည့်ကနေတာမျိုး ၊ သဘောထားမမှန်တာကို သတိထားမိကြဖို့ လိုပါတယ် ။

“အားလုံးလွှတ်ပေးရင်ကော”လို့ မေးစရာရှိပါတယ် ၊ လွှတ်ပေးချင်လည်း လွှတ်ပေးနိုင်တာပါပဲ ၊ “ခြံထဲကကြက်တွေ ခြင်းထဲ ကြိုက်တဲ့အ ချိန်ပြန်ကောက်ထည့်လို့ရတာပဲ” ဆိုတာမျိုး လွှတ်ပေးနိုင်ပါတယ် ၊ အရင်ကလည်း ဒီလိုလွှတ်ပေးခဲ့ဖူးတာပါပဲ ၊ ဒေါ်အောင်ဆန်းစုကြည် ကိုရော ၊ ကိုမင်းကိုနိုင်နဲ့ ၈၈ မျိုးဆက်ကျောင်းသားတွေရော အပြင်မှာ လွတ်နေတဲ့အချိန်တွေ ရှိခဲ့ဖူးတာပါပဲ ၊ မတရားအဖမ်းခံထားရသူ တွေမို့ ပြန်လွတ်စေချင်တဲ့ဆန္ဒကြောင့် တောင်းဆိုနေတာမှန်ပေမဲ့ သူတို့လွတ်ယုံနဲ့ ပြည်သူတွေဖိနှိပ်ခံဘဝက လွတ်မြောက်သေးတာမှ မဟုတ်တာ ၊ အဲဒီအတွက် ဆက်တိုက်ပွဲဝင်ကြရမှာပါပဲ ၊ စစ်အုပ်စုကလည်း လွှတ်ပေးလိုက်တဲ့ထဲက ဘယ်သူ့ကိုမဆို သူတို့ထိုင်ခုံကိုကန် လှဲဖို့လုပ်ပြီဆိုရင် ပြန်ဖမ်းဦးမှာပါပဲ ၊ လွတ်လပ်စွာဆန္ဒထုတ်ဖေါ်ခွင့် ၊ လွတ်လပ်စွာဟောပြောခွင့် ၊ လွတ်လပ်စွာရေးသားခွင့်တွေရှိပါပြီလို့ ဘယ်သူအာမခံမလဲ၊ မတရားမှုကိုမခံချင်တဲ့သူက ဆန္ဒထုတ်ဖေါ်တိုက်ပွဲဝင် ၊ စစ်အုပ်စုကပြန်ဖမ်း ၊ တခါ နိုင်ငံရေးအကျဉ်းသားလွှတ်ပေး ပြန်တောင်းဆို ၊ ဒီလို သံသရာလည်နေကြဦးမှာပဲမဟုတ်လား ။

ပြည်သူတွေအတွက်အပြောင်းအလဲဆိုတာ အာဏာပိုင်တွေကစေတနာမှန်မှဖြစ်မှာပါ ၊ နေဝင်းခေတ်ကလည်း ဆိုရှယ်လစ်စနစ်နဲ့တိုင်း ပြည်ကို ဘယ်လိုတည်ဆောက်မယ်ပြောပြော ၊ စစ်ယူနီဖေါင်းတွေချွတ်ပြီး ဘယ်လိုပဲအရပ်သားအစိုးရပါလုပ်ပြပြ ၊ ပြည်သူကိုစေတနာ မမှန်တဲ့အတွက် ဖွံ့ဖြိုးဆဲနိုင်ငံဆိုတဲ့အခြေအနေကနေ ၊ အဆင်းရဲဆုံးနိုင်ငံဆိုတဲ့အဆင့်ကိုရောက်သွားပြီး လူတန်းမစေ့ဖြစ်ခဲ့ကြရပါတယ် ၊ ခုလည်းဒီလိုပါပဲ ၊ ခေတ်မှီဖွံ့ဖြိုးတိုးတက်တဲ့ နိုင်ငံသစ်ကိုစတင်နေပါပြီလို့ စစ်အုပ်စုဟန်ရေးပြနေတဲ့အချိန်မှာ ရန်ကုန်မန္တလေးလမ်းမကြီး ပေါ်ကကျေးရွာတွေတောင် လျှပ်စစ်မီးမရှိ ၊ မှောင်ထဲနေရဆဲပါပဲ ၊ ကိုယ့်ရွာမှာကျောင်းမရှိလို့ ဖိနပ်မပါ ၊ နှပ်ချေးတွဲလောင်းကလေးတွေက လမ်းမပေါ်ကြုံရာကားတားစီးပြီးသွားနေကြရဆဲပါပဲ ၊ စားဝတ်နေမှုအခက်အခဲတွေကြောင့် ရေးတတ်ဖတ်တတ်ပြီးရင် ကျောင်းထွက် ၊ အလုပ်ဝင်နေကြရတဲ့ကလေးတွေ ၊ အများကြီးပါပဲ ၊ ရွာမှာဆေးခန်းမရှိလို့ ၊ ဆေးခန်းရှိရင်တောင် ဆေးမရှိလို့ ၊ ဆေးရှိရင်လည်း ငွေမပေး နိုင်လို့ မြွေကိုက်ခံရပြီးသေတဲ့သူတွေ ၊ မီးမဖွားနိုင်လို့သေတဲ့သူတွေ ၊ ဖျားနာပြီးသေတဲ့သူတွေ အများကြီးပါပဲ ၊ မြို့ပေါ်တွေမှာလည်း အလုပ်လက်မဲ့ ၊ အလုပ်ရှိတော့လည်း ရတဲ့လစာနဲ့ ကုန်ဈေးနှုန်းကမမျှတ ၊ မွဲပြာကျနေတဲ့အခြေအနေမှာပဲ ဗမာပြည်သူတရပ်လုံးရှိနေကြ ဆဲပါ ၊ တိုင်းရင်းသားဒေသတွေမှာဆိုရင်လည်း ခုချိန်ထိစစ်ပွဲတွေဖြစ်ပွားဆဲဖြစ်ပြီး စစ်တပ်ရဲ့ရွာဖျက်ဆီးမှုတွေ ၊ စိုက်ခင်းဖျက်ဆီးမှုတွေ ၊ မုဒိန်းကျင့်စော်ကားမှုတွေ ၊ ပေါ်တာဆွဲသတ်ဖြတ်မှုတွေရှိနေဆဲဖြစ်ပြီး ပြည်သူတွေမှာ စစ်ပွဲလွတ်ရာ ရှောင်ပုန်းပြေးလွှား ဒုက္ခပင်လယ် ဝေနေဆဲပါ ။

ဒေါ်အောင်ဆန်းစုကြည် ခြံရှေ့မှာတရားဟောပွဲတွေမှာဟောပြောခဲ့တာတွေထဲက သဘောတူနှစ်ခြိုက်ပြီး မှတ်သားထားမိခဲ့တာရှိပါတယ် ၊ “တိုင်းပြည်တိုးတက်တယ် မတိုးတက်ဘူးဆိုတာက ပြည်သူတွေရဲ့အခြေအနေနဲ့ပဲဆိုင်တယ် ၊ ဘယ်လိုပဲ လမ်းတွေဖေါက် ၊ ဆည်တွေ တံတားတွေဆောက်နေပါစေ ၊ ပြည်သူတွေစားဝတ်နေရေးအဆင်မပြေသေးသမျှ ဖွံ့ဖြိုးတိုးတက်တယ်မပြောနိုင်ပါဘူး”တဲ့ ၊ ပြည်သူတွေ “ဝေး”ကနဲ လက်ခုတ်တွေတီးအားပေးလိုက်ကြတာများ ။

 ပြည်သူတွေရဲ့ စားဝတ်နေရေး ၊ ပညာရေး ၊ ကျန်းမာရေး ကဏ္ဍစုံနိမ့်ကျယိုယွင်းပြီး လူတန်းစေ့မဖြစ်တဲ့ဘဝအခြေအနေတွေဟာ အကြောင်းအရာတခုချင်းချရေးပြရင် ဆုံးမှာတောင်မဟုတ်ပါဘူး ၊ လူ့အခွင့်အရေးခံစားရမှုမှာကျတော့ရော ၊ လွတ်လပ်စွာဆန္ဒထုတ်ဖေါ် ခွင့် ၊ လွတ်လပ်စွာဟောပြောခွင့် ၊ လွတ်လပ်စွာရေးသားခွင့်တွေ ရှိပြီလား ၊ ဝေးပါသေးရဲ့ ။ လယ်သိမ်း ၊ မြေသိမ်း ၊ စိုက်ခင်းသိမ်းနဲ့ ရုပ်ရှင်တွေထဲ အင်္ဂလိပ်ခေတ်က ချစ်တီးကျွဲနွားဆွဲအိမ်သိမ်းလုပ်သလိုအခြေအနေမျိုးရှိနေတာတွေကိုတောင် တိုင်ရင် တိုင်တဲ့သူပဲအဖမ်း ခံရတဲ့အခြေအနေမျိုး ။ 

နေဝင်းခေတ် ၊ မဆလခေတ်ကလည်း ဒီလိုအခြေအနေပဲ ၊ နဝတခေတ်လည်း ဒီလိုပဲ ၊ နအဖခေတ်လည်း ဒီလိုပဲ ၊ ခုသိန်းစိန်လက်ထက် လည်း ဒီလိုပဲဆိုတော့ ဘာတွေပြောင်းလည်းစပြုလာပါပြီလို့ လက်ခံပေးရပါ့မလဲ ၊ ကိုဇာကနာကတော့ လွတ်လာလာခြင်းပြောပါတယ် ၊ “ပါတီထောင်ဖို့ ၊ ပါတီဝင်လုပ်ဖို့ဆိုတာထက် ၈၈တုန်းက ကျနော်တို့ ဘာကြောင့်လမ်းပေါ်ထွက်ခဲ့ကြတာလဲ ၊ ပျင်းလို့ထွက်ခဲ့ကြတာ မဟုတ်ပါဘူး၊ လိုချင်တာတွေရှိလို့ ထွက်ခဲ့ကြတာပါ ၊ ကျနော်တို့ တကယ်လိုချင်တာရပြီလား ၊ မရသေးဘူးဆိုရင် ရအောင်လုပ်ကြရမယ်” တဲ့ ။ 

အရမ်းမှန်လွန်းပါတယ် ၊ ကျနော်တို့တကယ်လိုချင်တာ အပြောင်းအလဲပါ ၊ ပြည်သူတွေဆင်းရဲမွဲတေနေတဲ့ လက်ရှိအခြေအနေမျိုးကနေ ၊ စားဝတ်နေမှုဘဝ ပြည့်စုံမျှတတဲ့အခြေအနေကိုပြောင်းလဲဖို့ ၈၈ကနေခုထိ ကျနော်တို့ တိုက်ပွဲဝင်နေကြတာပါ ၊ ကျနော်တို့လိုချင်တာ မရ သေးပါဘူး ၊ ဒီတော့ ရတဲ့အထိ ဆက်တိုက်ပွဲဝင်ကြရမှာပါ ၊ ဒီအချိန်မှာ ဘာလုပ်ကြမလဲလို့ တွေဝေနေစရာ မလိုပါဘူး ၊ စစ်အာဏာရှင် စနစ်ချုပ်ငြိမ်းပြီး ပြည်သူတွေဖိနှိပ်ခံဘဝကလွတ်မြောက်ဖို့ ၊ ဆင်းရဲတွင်းကလွတ်ဖို့ ၊ ကိုယ်ယုံကြည်ရာ ၊ စိတ်အားထက်သန်ရာ လုပ်ငန်း စဉ်တွေနဲ့ တိုက်ပွဲဝင်ကြဖို့ပဲလိုပါတယ် ။

0 comments: