လူ့အခွင့်အရေး လေးစားရန် ၈၈ အဖွဲ့ တောင်းဆို

Tuesday, 07 April 2009 20:00 သန်းထိုက်ဦး
ွှ့The Irrawaddy News

နအဖ စစ်အစိုးရ အနေဖြင့် လူ့အခွင့်အရေးကို လေးစားလိုက်နာပြီး ပြုပြင်ပြောင်းလဲမှုများ လုပ်ဆောင်မှသာလျှင် နိုင်ငံတကာ ဒဏ်ခတ်ပိတ်ဆို့မှုများသည် ရုတ်သိမ်းသွား စေနိုင်ပြီး တိုင်းပြည် နှင့် လူထုအတွက် အကျိုးရှိနိုင်မည် ဖြစ်ကြောင်း ၈၈ မျိုးဆက် ကျောင်းသားများက ယမန်နေ့တွင် တိုက်တွန်းလိုက်သည် ။

ဧပြီလ ၆ရက်နေ့ရက်စွဲဖြင့် ၈၈ မျိုးဆက်ကျောင်းသားများက စစ်အစိုးရသို့ ပေးပို့သောအိတ်ဖွင့်ပေးစာတွင် ၂၀၁၀ ရွေးကောက်ပွဲ မတိုင်မီ တရားဥပဒေ စိုးမိုးရန် ၊ ဖွဲ့စည်းပုံ အခြေခံဥပဒေသစ်တွင် လူ့အခွင့်အရေး ပြဌာန်းချက်များ ပါမပါ သုံးသပ်ရန်၊ နိုင်ငံရေး အကျဉ်းသားများ လွှတ်ပေး ရန်၊ စစ်တပ်အတွင်း လူ့အခွင့်အရေး နားလည် ကျင့်သုံး ရန် စသည့် အခြေခံ လူ့အခွင့်အရေး ဆိုင်ရာများကို အဓိက တိုက်တွန်း တောင်းဆိုထားခြင်း ဖြစ်သည်။

အမျိုးသားဒီမိုကရေစီအဖွဲ့ချုပ်(အန်အယ်လ်ဒီ)နှင့် ပြည်သူ့လွှတ်တော် ကိုယ်စားပြုကော်မတီ(စီအာပီပီ) တို့ က တောင်းဆိုထားသည့် အဆိုပါ အချက်များကို အမြန်ဆုံးဆောင်ရွက်ပေးခြင်းဖြင့် ပိတ်ဆို့ဒဏ်ခတ်မှုများ တဆင့်ပြီး တဆင့် လျော့ကျ ဖယ်ရှား ပေးသွားလိမ့်မည်ဟု ယုံကြည်ပါကြောင်းလည်း ၈၈ မျိုးဆက်ကျောင်းသားများအဖွဲ့က ပြောသည်။

၈၈ ကျောင်းသား ခေါင်းဆောင်တဦးဖြစ်သည့် ကိုထွန်းမြင့်အောင်က“တောင်းဆိုချက်များကို ပစ်ပယ်ထားပြီး ဒီမိုကရေစီရေး ၊ လူ့အခွင့်အရေးလှုပ်ရှားနေသူမှန်သမျှအား ကန့်သတ်ဖိနှိပ် ဖမ်းဆီးထောင်ချနေခြင်းများကိုသာ နအဖ စစ်အစိုးရက ဆက်တိုက် ကျူးလွန် နေသည့်အတွက် ဒီမိုကရေစီ နှင့် လူအခွင့်အရေးကို အလေးထားသော နိုင်ငံကြီးများက နအဖ စစ်အစိုးရအပေါ် နိုင်ငံရေး စီးပွားရေး လူမှုရေး အထွေထွေ ပိတ်ဆို့ ဒဏ်ခတ်မှုများပြု လုပ် ထားခဲ့ခြင်း ဖြစ်သည်” ဟု ပြောသည် ။

စီးပွားရေး ပိတ်ဆို့မှုများနှင့်ပတ်သက်၍ နအဖ ၀န်ကြီးချုပ် ဗိုလ်ချုပ်သိန်းစိန်က ကုလသမဂ္ဂ အထွေထွေ အတွင်း အရေးမှူးချုပ်၏ အကြံပေးပုဂ္ဂိုလ် မစ္စတာဂန်ဘာရီ နှင့် တွေ့ဆုံရာတွင် “ကုလသမဂ္ဂအနေဖြင့် မြန်မာနိုင်ငံအပေါ် စီးပွားရေး ပိတ်ဆို့မှုများအား အရင်ဖယ်ရှားပေးရန် ကြိုးပမ်းဆောင်ရွက်သင့်ကြောင်း တောင်းဆိုခဲ့သည်ဟု တောင်းဆိုချက်တွင် ဖော်ပြထားသည်။

၎င်း တောင်းဆိုချက်တွင် နိုင်ငံတကာက စီးပွားရေး ပိတ်ဆို့ဒဏ်ခတ်မှုများသည် နအဖ စစ်အစိုးရ၏ ဒီမိုကရေစီ ရေး၊ လူ့အခွင့်အရေးဆိုင်ရာ ကျူးလွန်ချိုးဖောက်မှုများကြောင့်သာဖြစ်သည်ဟု နားလည်ယုံကြည်ကြောင်းလည်း ဆိုထားသည်။

တချိန်တည်းတွင် နိုင်ငံတကာ စီးပွားရေး ပိတ်ဆို့မှု နှင့် ပတ်သက်၍ “ မြန်မာနိုင်ငံအပေါ် ပိတ်ဆို့မှုများ ရုပ်သိမ်း ရေး ပြည်တွင်းပြည်ပ အင်အားစုများ ၂၀၀၉ လှုပ်ရှားမှု” ခေါင်းစဉ်ဖြင့် ရန်ကုန်မြို့ရှိ ဟိုတယ်တခု တွင် ယနေ့ နံနက် ၁၀ နာရီခွဲ မှ ၁ နာရီ အထိ သတင်းစာ ရှင်းလင်းပွဲ တရပ် ပြုလုပ်ခဲ့သည် ။

သတင်းစာရှင်းလင်းပွဲတွင် ဦးဆောင်ပါဝင်သူ ကိုအောင်ခိုင်ဝင်းက နိုင်ငံတကာက မြန်မာနိုင်ငံအပေါ် စီးပွား ရေး ပိတ်ဆို့မှုတွေဟာ စစ်အစိုးရကို ထိခိုင်နစ်နာမှု မရှိဘဲ ပြည်သူများကိုသာ ထိခိုက်မှုရှိကြောင်း ပြောသည်။

ယင်းသတင်းစာရှင်းလင်းပွဲသို့ ပြည်တွင်းမီဒီယာများကို ဖိတ်ခေါ်ခဲ့သော်လည်း ယခုပွဲကျင်းပသူများသည် အစိုးရ လိုလားသူများဖြစ်၍ ရန်ကုန်မြို့ရှိ ဂျာနယ်လစ် အများစုက မတက်ရောက်ခဲ့ကြောင်း သိရှိရသည်။