Tuesday, December 23, 2008

နာဂစ်ကူညီရေး ပြုလုပ်သူ အမျိုးသမီး ထောင်တွင်း၌ ကျန်းမာရေး ဆိုးဝါးနေ

ဧရာဝတီ၊ ဒီဇင်ဘာလ ၂၂ ရက် ၂၀၀၈

စစ်အစိုးရက ဖမ်းဆီး ထားသည့် နာဂစ် ဒုက္ခသည်များ ကူညီ ကယ်ဆယ်ရေး ပြုလုပ်ခဲ့သူ မယာဉ်ယာဉ်ဝိုင်းသည် အကျဉ်းထောင် အတွင်း၌ ကျန်းမာရေး ဆိုးဝါးနေပြီး ဆေးဝါးကုသမှုလုံလောက်စွာ ခံယူခွင့် မရကြောင်း အင်းစိန်ထောင် ၀န်ထမ်း အသိုင်းအ၀န်းက ပြောသည်။

အသက် ၃၆ နှစ်ရှိ အဆိုပါ မယာဉ်ယာဉ်ဝိုင်းသည် ထောင်တွင်း၌ သွေးအံခြင်း၊ အစာအိမ်ရောဂါဖြစ်ခြင်း စသည့် ဝေဒနာများ ခံစားနေရပြီး ဆန်ပြုတ်သောက်နေရသည်မှာ ၂ လခန့်ရှိပြီဖြစ်သည်ဟု အင်းစိန်ထောင် ၀န်ထမ်းတဦး ကပြောသည်။

“ဒီနေ့ သူ့အစ်မ လာတော့ ပြောတယ်၊ ထောင်ထဲမှာ ဆန်ပြုတ်ပဲ သောက်နေရတာ ၂ လလောက်ရှိပြီ၊ အဲဒါ ကျန်ခဲ့တဲ့ တပတ်က အံတာ သွေးပါတယ်၊ သူ့ကျန်းမာရေး အခြေအနေက အမျိုးသမီး ရောဂါလည်း ရှိတော့ ၊ သူ့ကို အပြင်ဆေးရုံပြရမှာကို ထောင်ဆေးရုံမှာပဲ ပြနေရတယ်၊ လောလောဆယ် ထောင်က လမ်းကြောင်း တောင်းထားလို့တဲ့၊ နောက်မှပဲ ပြပေးမယ်တဲ့၊ အင်းစိန်ထောင်မှာပဲ”ဟု ၎င်းက ဧရာဝတီသို့ ပြောသည်။

မယာဉ်ယာဉ်ဝိုင်းသည် နာဂစ်မုန်တိုင်း တိုက်ခတ်ပြီးနောက် ဇွန်လအတွင်းက ထင်ရှားသည့် လူရွှင်တော် ဇာဂနာ အပါအ၀င် တခြားသော မုန်တိုင်းဒုက္ခသည်များကို ကူညီကယ်ဆယ်ရေး လုပ်နေသူများနှင့်အတူ အာဏာပိုင်များ ၏ ဖမ်းဆီးအရေးယူမှုကို ခံခဲ့ရခြင်းဖြစ်ကြောင်းသိရသည်။

ထိုင်းနိုင်ငံအခြေစိုက် နိုင်ငံရေးအကျဉ်းသားများ ကူညီစောင့် ရှောက်ရေးအသင်း(အေအေပီပီ) အတွင်းရေးမှူး ဦးတိတ်နိုင်ကလည်း“သူက သူနိုင်သလောက် နာဂစ် ဒုက္ခသည်တွေကို ကူညီခဲ့တဲ့ အမျိုးသမီး တယောက်ပါ”ဟု ပြောသည်။

လတ်တလော မြန်မာနိုင်ငံရှိ အကျဉ်းထောင်များတွင် ဆရာဝန်လုံလောက်စွာမရှိကြောင်း၊ အကျဉ်းသားများအနေ နှင့် ကျန်းမာရေး စောင့်ရှောက်မှုခံယူရန် အခက်အခဲများရှိကြောင်းလည်း ဦးတိတ်နိုင်ငံက ဆိုသည်။

“ဒီနေ့ ထောင်တွေရဲ့ လက်ငင်း အခြေအနေတွေမှာတော့၊ ထောင်တိုင်း လိုလိုမှာပဲ ကျန်းမာရေး ချို့တဲ့မှုတွေ ရှိတယ်၊ ပထမ ဦးဆုံးအချက်ကတော့ အိုင်စီအာစီ ၀င်ရောက် ကူညီခွင့် မရတာလည်း ပါမှာပေါ့၊ နောက်တခုက ထောင်တွေမှာ ဆရာဝန်မရှိတဲ့ ထောင်က အများစုဖြစ်နေတယ်၊ ဆရာဝန် ရှိရင်တောင်မှ နိုင်ငံရေး အကျဉ်းသား တယောက် ကျန်းမာရေး မကောင်းလို့ ဆရာဝန်ပြခွင့် က အာဏာပိုင်အဆင့်ဆင့်ကို တင်ရတဲ့ ကိစ္စမျိုးတွေရှိတယ်၊ အဲဒါ ကြောင့် မလိုအပ်ဘဲနဲ့ ရောဂါတွေက ပိုပြီးတော့ ပြင်းထန်လာတဲ့ကိစ္စ မျိုးတွေ၊ အသက်ပါ ဆုံးရှုံးသွားရတဲ့ ကိစ္စမျိုးတွေဟာ အခုနောက်ပိုင်းမှာ တကယ်ကို စိုးရိမ်စရာ အခြေအနေတွေဖြစ်ပါတယ်”ဟု ဦးတိတ်နိုင်က ပြောပြ သည်။

0 comments: