နိုင်ငံတကာ ဥပဒေစံနှုန်းနှင့်အညီ ကျင့်သုံးရန် စစ်အစိုးရကို တောင်းဆို

မဇ္ဈိမ-သန်းထိုက်ဦး၊ ဒီဇင်ဘာလ ၁၀ ရက် ၂၀၀၈

ချင်းမိုင်။ ။ ကမ္ဘာ့နိုင်ငံများ အသိအမှတ်ပြုသည့် တရားဥပဒေအတိုင်း ကျင့်သုံးရန်အတွက် မြန်မာစစ်အစိုးရအား ထိုင်းနိုင်ငံ ဘန်ကောက်ရှိ မြန်မာ့ ဒီမိုကရေစီရေး လှုပ်ရှားသူများက ယနေ့ တိုက်တွန်းလိုက်သည်။

ယနေ့ နှစ် ၆၀ မြောက် နိုင်ငံတကာ လူ့အခွင့်အရေးနေ့တွင် ထိုင်းအခြေစိုက် ရောင်ခြည်ဦး အလုပ်သမားများအဖွဲ့၊ မြန်မာနိုင်ငံ အကျဉ်းသားဟောင်းများအဖွဲ့ (ABEP) နှင့် မြန်မာကျောင်းသားများ ဦးရေ ၆၀ ခန့်က ဘန်ကောက်ရှိ ကုလသမဂ္ဂ ဒုက္ခသည်များဆိုင်ရာ မဟာမင်းကြီးရုံး - UNHCR ရှေ့တွင် ဆန္ဒပြကာ ပြောဆိုခြင်း ဖြစ်သည်။

"ပြည်တွင်းမှာရော၊ ပြည်ပမှာရော ဆုံးရှုံးနေတဲ့ လူ့အခွင့်အရေးတွေကို ကမ္ဘာကနေ အသိအမှတ်ပြုဖို့နဲ့ နိုင်ငံတကာ တရားဥပဒေအတိုင်း မြန်မာအစိုးရကို ဖိအားပေးနိုင်ဖို့ ကျနော်တို့က UNHCR ကို လာရောက် မေတ္တာရပ်ခံ တောင်းဆိုတာပါ" ဟု ဆန္ဒပြပွဲဖြစ်မြောက်ရေး တာဝန်ခံ ကိုမြင့်ဇူက မဇ္ဈိမကို ပြောသည်။

ဆန္ဒပြသူ မြန်မာရွှေ့ပြောင်းလုပ်သား ကိုသိန်းဝင်းက "နိုင်ငံတကာ လူ့အခွင့်အရေးနေ့ဟာ လူသားအားလုံးနဲ့ ဆိုင်တဲ့ နေ့ပါပဲ။ ဆိုတော့ လူသားတိုင်းမှာ လူသားတိုင်း ရထိုက်တဲ့ အခွင့်အရေးတွေ ရှိပါတယ်။ ကျနော်တို့က လူသားတိုင်း၊ လူသားတိုင်း တန်းတူတန်းမျှ ရသင့်တဲ့ အခွင့်အရေးတွေကို တောင်းဆိုချင်လို့ ဆန္ဒလာပြတာပါ" ဟု ပြောသည်။

၁၉၄၈ ခုနှစ် ဒီဇင်ဘာ ၁၀ ရက်နေ့က ပြင်သစ်နိုင်ငံ ပဲရစ်မြို့ရှိ ကုလသမဂ္ဂတွင် အချက် ၃၀ ပါ အပြည်ပြည်ဆိုင်ရာ လူ့အခွင့်အရေး ကြေညာစာတမ်းကို ကမ္ဘာ့နိုင်ငံပေါင်း ၄၈ နိုင်ငံက သဘောတူ လက်မှတ်ရေးထိုးခဲ့သည့် အထိမ်းအမှတ်အဖြစ် နိုင်ငံတကာ လူ့အခွင့်အရေးနေ့ကို စတင် သတ်မှတ်ခဲ့သည်။

မြန်မာနိုင်ငံကလည်း ထိုစဉ်ကတည်းက ပါဝင်လက်မှတ်ရေးထိုးခဲ့သည်။

ဒီမိုကရေစီရေးနှင့် လူ့အခွင့်အရေးအတွက် တက်ကြွ လှုပ်ရှားသူများအား ပြီးခဲ့သည့်လအတွင်း မြန်မာစစ်အစိုးရက နှစ်ရှည်ထောင်ဒဏ် ချမှတ်ခဲ့သလို၊ ဝေးလံသည့် အကျဉ်းထောင်များသို့ ပြောင်းရွှေ့ခဲ့သည်များကို ဘန်ကောက်ဆန္ဒပွဲက ပြင်းထန်စွာ ပြစ်တင်ရှုတ်ချကြသည်။

သူတို့က "မြန်မာပြည်တွင်း၌ နိုင်ငံသားအချင်းချင်း လူ့အခွင့်အရေး ချိုးဖောက်မှုများ ရပ်တန့်ပေးရေး"၊ "လူ့အခွင့်အရေး ဆောင်ရွက်သူများအား ချက်ချင်း လွှတ်ပေးရေး"၊ "ကမ္ဘာ့ကျင့်ဝတ်နှင့်အညီ လူ့အခွင့်အရေးအား လက်ခံလိုက်နာပေးရေး" ဟူသည့် ကြွေးကြော်သံများ အော်ဟစ်ကာ ဆန္ဒပြကြသည်။

မြန်မာ့တရားစီရင်ရေး စနစ်သည် စစ်အစိုးရ၏ ခြယ်လှယ်ခြင်းကို ခံနေရပြီး၊ အပြစ်အနာအဆာများ ရှိနေသည်ဟု မြန်မာနိုင်ငံဆိုင်ရာ ကုလသမဂ္ဂ လူ့အခွင့်အရေး အထူးကိုယ်စားလှယ် မစ္စတာ တောမတ်စ် အိုဟေး ကင်တားနားကလည်း ပြီးခဲ့သည့်လ ၁၄ ရက်နေ့တွင် မဇ္ဈိမကို ပြောဆိုခဲ့သည်။

မြန်မာနိုင်ငံတွင် လွတ်လပ်ပြီး ဘက်မလိုက်သည့် တရားစီရင်ရေးစနစ် မရှိကြောင်းနှင့် မြန်မာအစိုးရအနေဖြင့် ဤသို့ အပြစ်ပေးမှုများကို ပြန်လည် စဉ်းစားသင့်ကြောင်း သူက ပြောဆိုခဲ့သည်။

ထို့အပြင် သြဂုတ်လအတွင်းက မြန်မာပြည်သို့ ပထမအကြိမ် သွားရောက်ခဲ့စဉ်ကလည်း လူ့အခွင့်အရေးဆိုင်ရာ အဓိက အချက် ၄ ချက်ကို စဉ်းစားပါရန် စစ်အစိုးရကို သူက အဆိုပြုခဲ့သေးသည်။

ယင်းအချက် ၄ ချက်မှာ ဖွဲ့စည်းပုံ အခြေခံဥပဒေသစ်နှင့် အပြည်ပြည်ဆိုင်ရာသို့ တာဝန်ရှိမှုများနှင့်အညီ အမျိုးသား ဥပဒေပြုရေးကို ပြန်လည်သုံးသပ်ရန်၊ နိုင်ငံရေး အကျဉ်းသားများအား လွှတ်ပေးရန်၊ တပ်မတော်ကို ပြန်လည်သုံးသပ်ရန်နှင့် အာဏာကို မည်သို့ ကျင့်သုံးသည် ဆိုသည်ကို လေ့လာရန်တို့ ဖြစ်သည်။

သို့သော်လည်း ယခုလို ပြောဆိုပြီး နောက်တလတွင် စစ်အစိုးရက ယခုလို နှစ်ရှည်ထောင်ဒဏ်များ ချမှတ်ခဲ့ကာ၊ ဦးရေ ၂၀၀ ခန့်ကို နယ်စွန်နယ်ဖျား ဒေသများရှိ ထောင်များသို့ ပို့ဆောင်ပစ်ခြင်းဖြစ်သည်။