Friday, July 11, 2008

နာဂစ်ဒုက္ခသည်များ ပြန်လည်ထူထောင်ရေးအတွက် ဒေါ်လာ သန်း ၂၈၀ ထပ်မံလိုအပ်

ဧရာဝတီ | ဇူလိုင် ၁၁၊ ၂၀၀၈

နာဂစ်မုန်တိုင်းဒဏ်ခံခဲ့ရသည့် ဒုက္ခသည်များ ပြန်လည်ထူထောင်ရေးအတွက် အမေရိကန်ဒေါ်လာ သန်းပေါင်း ၂၈၀ ထပ်မံ လှူဒါန်းရန် ကမ္ဘာ့ကုလသမဂ္ဂက အဖွဲ့ဝင်နိုင်ငံများအား တိုက်တွန်းလိုက်သည်။

မစ္စတာ ဂျွန် ဟုမ်းလ်စ်နှင့်အဖွဲ့ နာဂစ်ဒုက္ခသည်များအား တွေ့ဆုံစဉ် (ဓာတ်ပုံ - အေအက်ဖ်ပီ)

အမေရိကန်နိုင်ငံ နယူးယောက်မြို့ရှိ ကုလသမဂ္ဂရုံးချုပ်တွင် ယမန်နေ့ကပြုလုပ်သည့် အထူးအစည်းအဝေးပွဲ၌ ကုလသမဂ္ဂ လူသားချင်း ညှာတာထောက်ထားမှုဆိုင်ရာ ဌာနအကြီးအကဲ မစ္စတာ ဂျွန် ဟုမ်းလ်စ်က ရန်ပုံငွေတောင်းခံခြင်းဖြစ်ပြီး ၎င်း ရန်ပုံငွေအား ကုလသမဂ္ဂ လက်အောက်ခံအဖွဲ့ ၁၃ ဖွဲ့နှင့် အန်ဂျီအိုအဖွဲ့ ၂၃ ဖွဲ့က မုန်တိုင်း ကယ်ဆယ်ရေးလုပ်ငန်း ၁၀၃ မျိုး အတွက် အသုံးပြုမည်ဟု ဟုမ်းလ်စ်က ပြောသည်။

ပြန်လည်ထူထောင်ရေးလုပ်ငန်းများအတွက် စုစုပေါင်းလိုအပ်သည့် ရန်ပုံငွေမှာ အမေရိကန်ဒေါ်လာ ၄၈၁ သန်း ဖြစ်ပြီး မူလကတောင်းခံထားသည့် အမေရိကန်ဒေါ်လာ ၂၀၁ သန်း အနက် တချို့တ၀က်ရပြီးဖြစ်သောကြောင့် ထပ်မံလိုအပ်ငွေ စုစုပေါင်းသည် အမေရိကန်ဒေါ်လာ ၃၀၄ သန်းဖြစ်သည်ဟုလည်း ဟုမ်းလ်စ်က ဖြည့်စွက် ပြောဆိုသည်။

နယူးယောက်ရှိ ကုလသမဂ္ဂရုံးချုပ်တွင်ပြုလုပ်သည့် အဆိုပါအစည်းအဝေးပွဲသို့ အာဆီယံ အတွင်းရေးမှူးချုပ် မစ္စတာ ဆူရင် ပစ်ဆူဝန် (Surin Pitsuwan) နှင့် ရန်ကုန်ရှိ ကုလသမဂ္ဂ လူသားချင်း ညှာတာထောက်ထားမှုဆိုင်ရာ ဌာနအကြီးအကဲ မစ္စတာ ဒန်နီရယ် ဘိတ်ကာ (Daniel Baker) တို့လည်း တက်ရောက်ကြသည်။

ပြန်လည်ထူထောင်ရေး ရန်ပုံငွေများအနက် စားနပ်ရိက္ခာအတွက် အမေရိကန်ဒေါ်လာ ၁၁၂ သန်း၊ စိုက်ပျိုးရေးအတွက် ၅၈ သန်း၊ အစောပိုင်း ကယ်ဆယ်ရေးလုပ်ငန်းများအတွက် ၅၄ သန်း၊ သောက်သုံးရေသန့်အတွက် သန်း ၅၀နှင့် ထောက်ပံ့ပို့ ဆောင်ရေးအတွက် သန်း ၅၀ အသုံးပြုသွားမည်ဟု ဟုမ်းလ်စ် က ပြောသည်။

မုန်းတိုင်းသင့်ဒေသများသို့ နိုင်ငံတကာမှကယ်ဆယ်ရေးများ ၀င်ရောက်လုပ်ကိုင်ခွင့်မရခင် ကိုယ်ထူကိုယ်ထ ကယ်ဆယ်ရေး လုပ်ခဲ့ကြသည့် ဒေသခံပြည်သူများ၊ ရဟန်းသံဃာတော်များနှင့် ပုဂ္ဂလိက အလှူရှင်များ၏ အစွမ်းကို လျှော့တွက်မိခဲ့သည် ဟုလည်း ဟုမ်းလ်စ်က ပြောဆိုလိုက်သည်။
မေလ ၂ ရက်နေ့နှင့် ၃ ရက်နေ့က မြန်မာနိုင်ငံ ရန်ကုန်တိုင်းနှင့် ဧရာဝတီမြစ်ဝကျွန်းပေါ်ဒေသတို့ကို တိုက်ခတ်သည့် နာဂစ် ဆိုင်ကလုန်းမုန်တိုင်းကြောင့် လူဦးရေ ရှစ်သောင်းကျော် အသက်ဆုံးရှုံးကာ ငါးသောင်းကျော် ပျောက်ဆုံးနေကြောင်း စစ်အစိုးရ စာရင်းများအရသည်ရသည်။ လူဦးရေ ၂ ဒဿမ ၄ သန်း အိုးမဲ့အိမ်မဲ့ ဖြစ်ခဲ့သည်။

0 comments: