မုန်တိုင်းဒဏ်ခံရသော မြို့နယ်များ၌ ဆန္ဒမဲပေးပွဲရွှေ့ဆိုင်း

NEJ/ ၆ မေ ၂၀၀၈

ဆိုင်ကလုန်းမုန်တိုင်း ဒဏ်ခံလိုက်ရသည့် ဧရာဝတီနှင့် ရန်ကုန်တိုင်းအတွင်းရှိ (၄၇) မြို့နယ်၌ ဖွဲ့စည်းပုံမူကြမ်း အတည်ပြုရေး ဆန္ဒခံယူပွဲကို မေလ (၂၄) ရက်သို့ ရွှေ့ဆိုင်းလိုက်ကြောင်း ပြည်လုံးကျွတ်ဆန္ဒခံယူပွဲ ကျင်းပရေးကော်မရှင်က ယနေ့ ကြေညာသည်။

ဧရာဝတီတိုင်း၌ ရွှေ့ဆိုင်းလိုက်သည့်မြို့နယ်များမှာ ငပုတော၊ လပ္ပတ္တာ၊ မော်လမြိုင်ကျွန်း၊ ဖျာပုံ၊ ဘိုကလေး၊ ကျိုက်လတ်နှင့် ဒေးဒရဲ စုစုပေါင်း (၇) မြို့နယ်တို့ ဖြစ်သည်ဟု သိရသည်။

ရန်ကုန်တိုင်း၌ ရွှေ့ဆိုင်းလိုက်သည့် မြို့နယ်များမှာ တာမွေ၊ တောင်ဥက္ကလာပ၊ ဒဂုံဆိပ်ကမ်း၊ ဒဂုံမြို့သစ် တောင်ပိုင်း၊ မြောက်ပိုင်းနှင့်အရှေ့ပိုင်း၊ ဒေါပုံ၊ ပုဇွန်တောင်၊ ဗိုလ်တထောင်၊ မင်္ဂလာတောင်ညွန့်၊ မြောက်ဥက္ကလာပ၊ ရန်ကင်း၊ သာကေတ၊ သင်္ကန်းကျွန်း၊ ကမာရွတ်၊ ကြည့်မြင်တိုင်၊ ကျောက်တံတား၊ စမ်းချောင်း၊ ဆိပ်ကမ်း၊ ဒဂုံ၊ ပန်းဘဲတန်း၊ ဗဟန်း၊ မရမ်းကုန်း၊ လသာ၊ လှိုင်၊ လမ်းမတော်၊ အလုံ၊ သံလျှင်၊ ကျောက်တန်း၊ သုံးခွ၊ ခရမ်း၊ တွံတေး၊ ကွန်းခြံကုန်း၊ ကော့မှူး၊ ဒလ၊ ဆိပ်ကြီးခနောင်တို၊ အင်းစိန်၊ မင်္ဂလာဒုံ၊ ရွှေပြည်သာ၊ လှိုင်သာယာ စုစုပေါင်း
မြို့နယ် (၄၀) တို့ဖြစ်သည်။


ထို့အပြင် ဧရာဝတီတိုင်း၊ ရန်ကုန်တိုင်း၊ ပဲခူးတိုင်း၊ မွန်ပြည်နယ်နှင့် ကရင်ပြည်နယ်တို့အား
သဘာဝဘေးအန္တရာယ် ကျရောက်သော ဒေသများအဖြစ် မူလကကြေညာထားမှုကို ရုပ်သိမ်း လိုက်ပြီး (၄၇) မြိ်ု့နယ်ကိုသာ သဘာဝဘေးအန္တရာယ် ကျရောက်သော ဒေသများအဖြစ်
ဆက်လက် သတ်မှတ်ကြောင်း စစ်အစိုးရက ကြေညာသည်။

မြို့နယ် (၄၇) ခုအတွင်း ကျင်းပရန် သတ်မှတ်ထားသည့် ပြည်လုံးကျွတ် ဆန္ဒခံယူပွဲများကို ရွှေ့ဆိုင်းလိုက်ပြီး ထိုမြို့နယ်များအတွက် ဆန္ဒခံယူပွဲကို ၂၀၀၈ ခုနှစ် မေလ (၂၄ ) ရက်တွင် ကျင်းပမည်ဟု ပြည်လုံးကျွတ် ဆန္ဒခံယူပွဲကော်မရှင် ဥက္ကဋ္ဌ ဦးအောင်တိုးက ထုတ်ပြန်သည့် ကြေညာချက်၌ ဖော်ပြသည်။

ပြည်လုံးကျွတ်ဆန္ဒခံယူပွဲကို မြန်မာတနိုင်ငံလုံး၌ လာမည့် စနေနေ့ မေလ (၁၀) ရက်၌ ကျင်းပ မည်ဟု စစ်အစိုးရက ကြေညာထားပြီးဖြစ်သည်။

အကယ်၍ နအဖစစ်အစိုးရအနေဖြင့် ဆန္ဒခံယူပွဲကို ဆက်လက်ကျင်းပမည်ဆိုပါက မသင့်လျော် ကြောင်း အမျိုးသားဒီမိုကရေစီအဖွဲ့ချုပ် (အန်အယ်လ်ဒီ) က ပြောကြားသည်။

အန်အယ်လ်ဒီ အထူးပြန်ကြားရေးအဖွဲ့ဝင် ဦးသိန်းညွန့်က “အခုလို အခြေအနေမျိုးမှာ ဗမာပြည်ရဲ့ အောက်ပိုင်း စပါးစိုက်ပျိုးရေးအတွက်ရော၊ တိုင်းပြည်ရဲ့လူဦးရေအများစုကြီး ဘေးဒုက္ခ ကြုံတွေ့ နေရချိန်မှာ ဒီဆန္ဒခံယုပွဲကို ရှေ့တန်းတင်တယ်ဆိုကတည်းက ပြည်သူ့ရဲ့ဒုက္ခထက်ကို ကိုယ်ဖြစ် စေချင်တာအတွက်ပဲ ဆောင်ရွက်နေတာပါ။ ဒီလိုသာ ဆောင်ရွက်ရိုးမှန်ရင် ဒုက္ခရောက်နေတဲ့ ကိစ္စ ထက် မိမိရဲ့ကိစ္စကိုရှေ့တန်းတင်တယ်ဆိုရင်တော့ ဒါဟာ လွန်စွာ မနှစ်မြို့ဖွယ်ရာ ဖြစ်ရပ်ပဲလို့ ကျနော်တို့ကတော့ ပြောရမှာပဲ” ဟု ပြောသည်။

အန်အယ်လ်ဒီ ပြောရေးဆိုခွင့်ရှိသူ ဦးဉာဏ်ဝင်းကလည်း “ဒီလိုဘေးအန္တရာယ်သင့်တဲ့ နေရာမှာ ဆန္ဒခံယူပွဲ လုံးဝမလုပ်သင့်ဘူးလို့ ကျနော်တို့ ယူဆတယ်။ ဖွဲ့စည်းပုံအခြေခံဥပဒေက လူတွေရဲ့ ဒုက္ခအပေါ်မှာ တက်ပြီးတော့ နင်းနေသလို ဖြစ်နေတယ်။ ဒါကြောင့် မလုပ်သင့်ဘူးလို့ ယူဆတယ်”
ဟု ပြောသည်။ ။