Friday, April 25, 2008

မြန်မာသံရုံး ၀န်ထမ်းအများစု ကန့်ကွက်မဲပေး ပြန်ခေါ်လျှင် နိုင်ငံရေးခိုလှုံခွင့် တောင်းမည်

NEJ/ ၂၄ ဧပြီ ၂၀၀၈

နိုင်ငံခြားမြန်မာသံရုံးများတွင် တာဝန်ထမ်းဆောင်နေသည့် သံရုံးအရပ်သား ၀န်ထမ်းအတော် များများက ဖွဲ့စည်းပုံအခြေခံဥပဒေမူကြမ်း (၂၀၀၈) အတွက် ကန့်ကွက်မဲ ပေးကြသည်ဟု အမည် မဖော်လိုသည့် သံရုံးဝန်ထမ်းတဦးက ပြောသည်။

နိုင်ငံခြားရှိ မြန်မာသံရုံး အရပ်သားဝန်ထမ်းများကို ကန့်ကွက်မဲပေးသည့်အတွက် မြန်မာနိုင်ငံ သို့ပြန်ခေါ်လျှင် သက်ဆိုင်ရာနိုင်ငံများတွင် နိုင်ငံရေးခိုလှုံခွင့်တောင်းမည့် အလားအလာရှိသည် ဟုပါ ဥပရောပအခြေစိုက် မြန်မာသံရုံးနှင့် နီးစပ်သည့် အသိုင်းအ၀န်းက ပြောသည်။ အထူးသဖြင့် ရာထူးငယ်သည့် နိုင်ငံခြားမြန်မာသံရုံး အရပ်ဘက်ဝန်ထမ်းများက ကန့်ကွက်မဲ ထည့်ကြသည်ဟု ပြောသည်။


ပြည်ပရောက် မြန်မာများ ပြည်ပရှိ မြန်မာသံရုံးများ၌ မဲပေးရာတွင် ဧပြီ (၂၃) မှ (၂၅) ရက်
အတွင်း အပြီးဆောင်ရွက်သည့် သံရုံးများရှိသကဲ့သို့ အချို့မြန်မာသံရုံးများက ဧပြီ (၂၇) အထိ မဲပေးနိုင်သည်ဟု နေပြည်တော်သတင်းရပ်ကွက်က ပြောသည်။ မဲပေးရာတွင် မြန်မာသံ
အမတ်ကြီးများအနေဖြင့် တတ်နိုင်သမျှ ထောက်ခံမဲရရေး စည်းရုံးရန်အတွက်ပါ နိုင်ငံခြားရေး
ဝန်ကြီးဌာနက လျှို့ဝှက်ညွှန်ကြားထားသည်ဟု စုံစမ်းသိရသည်။

ဥရောပနိုင်ငံအတော်များများရှိ မြန်မာသံရုံးများ၌ ပြည်ပရောက် မြန်မာများ၏ (၈၀) ရာနှုန်းကျော် က ကန့်ကွက်မဲပေးသည်ဟု အမည်မဖော်လိုသည့် သံရုံးသတင်းရပ်ကွက်တခုက ပြောသည်။

မြန်မာနိုင်ငံဖြစ် စက္ကူပါးပါးပေါ်တွင် အမှားအမှန် ခြစ်ခိုင်းသည့်အတွက် ထောက်ခံမဲ၊ ကန့်ကွက်မဲ ကို မြင်နေရသည်။ သို့သော် သံအမတ်ကြီးများက မဲရေတွက်ခွင့်မရှိဘဲ နေပြည်တော် တိုက်ရိုက် ပို့ရမည် ဖြစ်သည့်အတွက် နောက်ဆုံး မည်သို့ အဖြေထွက်မည်ကို မသိနိုင်ပါဟု အဆိုပါ သတင်း ရပ်ကွက်က ပြောသည်။

သံရုံးဝန်ထမ်းများသည် နိုင်ငံခြားရေးဝန်ကြီးဌာန လက်အောက်ခံ ၀န်ထမ်းများဖြစ်ပြီး နေပြည် တော်ပြောင်းရွှေ့ရပြီးနောက်ပိုင်း စစ်အစိုးရအပေါ် နာကြည်းစိတ် ပိုများလာခြင်းဖြစ်သည်ဟု နေပြည်တော် နိုင်ငံခြားရေးဝန်ကြီးဌာန ၀န်ထမ်းတဦးက ပြောသည်။ စစ်တပ်က ခန့်ထားသည့် မြန်မာသံအမတ်ကြီး အတော်များများ အဂတိလိုက်စားသည်ကို မြင်သိနေသည့်အတွက် သံရုံး
ဝန်ထမ်းများ ပို၍ မကျေမနပ်ဖြစ်ရသည်ဟုပါ ၎င်းက ဆက်လက်ပြောသည်။

နေပြည်တော် ပြောင်းရွှေ့ရသည့် နိုင်ငံခြားရေးဝန်ကြီးဌာန ၀န်ထမ်းများ သောက်ရေမသန့်၍ ကျန်းမာရေး ချို့တဲ့နေချိန်တွင် ထိပ်ပိုင်းစစ်ခေါင်းဆောင်များက သောက်ရေသန့်ဖြင့် ရေချိုး သည်ကို သိရသဖြင့် ၀န်ထမ်းများကြား ပို၍ မကျေနပ်မှုများလာသည်ဟု နေပြည်တော်မှ အရာရှိ တဦးက ပြောသည်။ ။

0 comments: