အဓမ္မ လုပ်အားပေးကိစ္စ အိုင်အယ်အိုသို့ တိုင်ကြားရန် လှုပ်ရှားမှုများ ပြုလုပ်

မဇ္ဈိမသတင်းဌာန၊ ဇန်န၀ါရီလ ၈ ရက် ၂၀၀၈ ခုနှစ်

အဓမ္မလုပ်အားပေးကိစ္စကို အပြည်ပြည်ဆိုင်ရာ အလုပ်သမားအဖွဲ့ချုပ် (အိုင်အယ်အို) သို့ လွတ်လပ်စွာ တိုင်ကြားရေးနှင့် ပတ်သက်သည့် အသိပညာပေး လုပ်ငန်းများကို ပြည်သူအများ ပိုမို သိရှိစေရန်အတွက် မြန်မာပြည်တွင်းရှိ ‘အိုင်အယ်အိုနှင့် ဆက်သွယ် ဆောင်ရွက်သူများ ကွန်ယက်’ အဖွဲ့ဝင်များက ယခုလ ၄ ရက်နေ့မှ စတင်ကာ လုပ်ဆောင်နေပြီ ဖြစ်သည်။

မကြာသေးခင်က တိုင်းနှင့် ပြည်နယ်အချို့တွင် စတင် ဖွဲ့စည်းခဲ့သော အိုင်အယ်အိုနှင့် ဆက်သွယ် ဆောင်ရွက်သူများ ကွန်ယက်မှ အဖွဲ့ဝင်များသည် နှစ် ၆ဝ ပြည့် မြန်မာ့ လွတ်လပ်ရေးနေ့က ရန်ကုန်တိုင်းနှင့် ရခိုင်ပြည်နယ်တွင် အိုင်အယ်အိုနှင့် မြန်မာအစိုးရ၏ ၂ဝဝ၆ ခုနှစ် ဖေဖော်ဝါရီ ၂၆ ရက်နေ့က ချုပ်ဆိုခဲ့သော သဘောတူညီချက် စာရွက်များကို ဖြန့်ဝေခြင်း၊ ဒေသခံ ပြည်သူများနှင့် ဆွေးနွေးခြင်းများ စတင် ပြုလုပ်ခဲ့ကြသည်။

၎ ရက်နေ့ နံနက် ၉ နာရီခန့်က ရန်ကုန်တိုင်း ဒဂုံမြို့သစ်တောင်ပိုင်းတွင် အဖွဲ့ဝင် လူငယ် ၁ဝ ဦးခန့်သည် ဒဂုံတောင်ပိုင်းမှ တာမွေအထိ အဆိုပါ သဘောတူညီချက်များကို ဖြန့်ဝေခဲ့သလို၊ လှိုင်သာယာမြို့ ၁၈ ရပ်ကွက်တွင် ညနေ ၄ နာရီခန့်က ကွန်ယက်အဖွဲ့ဝင် ဒေသခံလူငယ် ၁၅ ဦးကလည်း အဓမ္မ လုပ်အားပေးစေခိုင်းမှု သဘောတူညီချက်များနှင့် ပတ်သက်၍ ဆွေးနွေးပွဲ ပြုလုပ်ရာတွင် ရဲတပ်ဖွဲ့ဝင်များက လာရောက် သတင်းယူခဲ့သော်လည်း ဖမ်းဆီးခြင်းမရှိဟု ရခိုင်ပြည်နယ်ရှိ ဦးဆောင်သူ တဦးက ပြောသည်။

အလားတူပင် ရခိုင်ပြည်နယ် တောင်ကုတ်နှင့် ရမ်းဗြဲမြို့နယ်များတွင်လည်း လွတ်လပ်ရေးနေ့မှာပင် အိုင်အယ်အိုနှင့် မြန်မာအစိုးရ သဘောတူညီချက် စာရွက်များကို ဖြန့်ဝေခဲ့ရာ တောင်ကုတ်မြို့နယ် ရဲတပ်ဖွဲ့မှူး ဦးဝင်းအောင်နီနှင့် ရဲတပ်ဖွဲ့ဝင် ၁ဝ ဦးခန့်က အတင်းအကျပ် ခေါ်ယူစစ်ဆေးပြီးနောက် ပြန်လွှတ်ပေးခဲ့သလို၊ ရမ်းဗြဲတွင်လည်း နံနက် ၈ နာရီခန့်က စိုးမဂျီ လမ်းတလျှောက်နှင့် မြို့အနောက်ဘက် ရမ္မာဝတီ ဈေးတဝိုက်တွင် စောင်ရေ ၃ဝဝ ခန့်ကို ဒေသခံလူငယ်များက ဖြန့်ဝေခဲ့သေးသည်။

အဖွဲ့ ဖွဲ့စည်းမှုနှင့် ပတ်သက်ပြီး ဦးဆောင်သူက “အဓိကအားဖြင့်တော့ အဓမ္မလုပ်အားပေး၊ ကလေးစစ်သား စတဲ့ အိုင်အယ်အိုနဲ့ သက်ဆိုင်တဲ့ ကိစ္စရပ်တွေကို မိမိတို့ရဲ့ လွတ်လပ်တဲ့ဆန္ဒနဲ့အတူ ပူးပေါင်း ဆောင်ရွက်ကြတာ ဖြစ်တယ်။ လောလောဆယ် ဆောင်ရွက်နေတာက အဓမ္မ လုပ်အားပေး စေခိုင်းမှု ပပျောက်ရေး ဖြစ်တယ်။ အဓမ္မ လုပ်အားပေး ပပျောက်ရေးနဲ့ ပတ်သက်ပြီးတော့ ဆောင်ရွက်တဲ့နေရာမှာ ပညာပေး ဆွေးနွေးတာတို့၊ အိုင်အယ်အိုကို တိုင်တန်းတဲ့နေရာမှာ ကူညီတာတို့ အဲဒီကိစ္စတွေကို တိုင်းနဲ့ ပြည်နယ်အလိုက် ညှိနှိုင်း ဆောင်ရွက်နေကြတာ ဖြစ်တယ်” ဟု ပြောသည်။

အိုင်အယ်အိုနှင့် နအဖ သဘောတူညီချက်တွင် အဓမ္မ လုပ်အားပေး ခိုင်းစေမှုကို အိုင်အယ်အိုသို့ လွတ်လပ်စွာ တိုင်ကြားရေးနှင့် ကာယကံရှင်ကို အကာအကွယ်ပေးရန် ပါရှိပြီး တိုင်ကြားချက်ကို ဆက်သွယ်ရေးအရာရှိ (အပြည်ပြည်ဆိုင်ရာ အလုပ်သမားအဖွဲ့ချုပ်၊ မြန်မာနိုင်ငံ) ထံ လိပ်မူပေးပို့ရမည်ဖြစ်ကာ တိုင်ချက်တွင် ခိုင်မာသည့် သက်သေအထောက်အထား လက်မှတ်၊ စာရွက်စာတမ်း၊ အမှန်တကယ် ဖြစ်ပျက်သည့်ကိစ္စကို အကျဉ်းချုံးဖော်ပြမှု၊ တိုင်တန်းသူ၏ ဆန္ဒကို ဖော်ပြရမည်ဖြစ်သည်။

သူက “တတိယအချက်က အရေးကြီးဆုံးပဲတဲ့။ တိုင်တန်းသူရဲ့ ဆန္ဒနဲ့ ပတ်သက်ပြီးတော့ အချက် ၃ ချက် ဖော်ပြတယ်။ အကြောင်းအရာ ၃ ချက်က အဓမ္မလုပ်အားပေးမှုဆိုတာ ဒီဧရိယာ၊ ဒီဒေသမှာ၊ နောက်တခါ ဘယ်တော့မှ မဖြစ်စေချင်တော့ဘူး ဆိုတဲ့ ဆန္ဒ၊ ဒါမှမဟုတ် လုပ်အားပေးခဲ့ရတဲ့ လုပ်အားခငွေကြေး ရယူလိုမှု၊ အဓမ္မလုပ်အားပေး ခိုင်းစေခဲ့တဲ့လူတွေကို အပြစ်ပေး အရေးယူပေးစေလိုတဲ့ ဆန္ဒ၊ အဲဒီအချက် ၃ ချက်ထဲက အနည်းဆုံးတချက် တိုင်စာမှာ ပါဖို့ လိုတယ်။ မှတ်ပုံတင်၊ နေရပ်လိပ်စာ အတိအကျ၊ လက်မှတ် အတိအကျ ရေးထိုးရမယ်” ဟု ပြောသည်။

အိုင်အယ်အိုသည် ဆွစ်ဇာလန်နိုင်ငံ ဂျနီဗာရုံးချုပ်သို့ တိုင်ကြားချက်ကို လှမ်းပို့ပြီး မြန်မာအစိုးရထံ အမှုကို လွှဲပြောင်းပေးခဲ့သည့် ဖြစ်ရပ်တခုတွင် နအဖ အလုပ်သမား ဝန်ကြီးဌာနက စစ်ဆေးရေးအဖွဲ့ ဖွဲ့စည်း စေလွှတ်သောအခါ မိမိတို့ သဘောထားကို မှန်ကန်စွာ ထွက်ဆိုခြင်း မရှိခဲ့ပုံကို သူက ပြောပြသည်။

သူက “အဓမ္မလုပ်အားပေး စေခိုင်းမှုတွေကို စေခိုင်းသူတွေဟာ အာဏာပိုင်တွေ ဖြစ်နေတဲ့အတွက် စစ်ဆေးရေး အဖွဲ့လာတဲ့အခါ အစိုးရဝန်ထမ်း အချင်းချင်း အကာအကွယ်ပေးတာ၊ အမှု ပျက်ပြယ်စေအောင် လုပ်တာ၊ တိုင်ကြားသူကို ဖိအားပေးတာတွေကြောင့် တိုင်ကြားတဲ့သူဟာ အာဏာပိုင်တွေနဲ့ ထိပ်တိုက် တွေ့တဲ့အခါ တွန့်ဆုတ်သွားတာ၊ အမှန်ကို မပြောရဲတာတွေ ရှိတတ်လို့ တိုင်ကြားချက်ဟာ အရာမရောက်ဘဲ ရှိခဲ့တယ်။ ဒါကြောင့် စစ်ဆေးရေးအဖွဲ့ကို မှန်ကန်စွာ ထွက်ဆိုဖို့ လိုအပ်တယ်” ဟု ပြောသည်။

ယခုလို အသိပညာပေး ဆွေးနွေးပွဲကို ပြုလုပ်ပြီးနောက် တောင်ကုတ်မြို့တွင် မီးကင်းအဓမ္မ စောင့်ခိုင်းရာ၌ ကင်းမစောင့်သူများထံ အာဏာပိုင်များက ကျပ်ငွေ ၃ ထောင်မှ တသောင်းအထိ တောင်းခံသည့်ကိစ္စနှင့် ခြိမ်းခြောက်မှုအချို့ ရှိခဲ့သည်ကို အိုင်အယ်အိုရုံးသို့ တိုင်ကြားရန်အတွက် ယမန်နေ့မှ စတင်ကာ လက်မှတ် ရေးထိုးနေကြရာတွင် လက်မှတ်ပေါင်း ၃ဝ ခန့်က ရရှိနေပြီ ဖြစ်သည်။

ရခိုင်ပြည်နယ်ရှိ ကွန်ယက်ခေါင်းဆောင်က “မီးကင်းကိစ္စ ဆိုပြီးတော့ အဓမ္မ စောင့်ခိုင်းတာပေါ့ဗျာ။ တချို့ ပိုက်ဆံပေးရတယ်။ တချို့တွေကလည်း အလုပ်ပင်ပန်းလာပေမယ့် ကြောက်လို့ လုပ်ပေးရတာ ရှိတယ်။ ဒါကလည်း အဓမ္မ လုပ်အားပေးပေါ့ဗျာ။ အဲဒါကို တိုင်တန်းမယ် ဆိုပြီးတော့ သူတို့က ဆောင်ရွက်တာ ဖြစ်တယ်” ဟု ပြောဆိုသည်။