လူ့အခွင့်အရေး လှုပ်ရှားသူများ လူ့အခွင့်အရေး ချိုးဖောက်ခံနေရ

မောင်ဒီး-မဇ္ဈိမသတင်းဌာန၊ ဇန်န၀ါရီလ ၈ ရက် ၂၀၀၈ ခုနှစ်

ရွှေဝါရောင် လှုပ်ရှားမှုအတွင်း မီဒီယာနှင့် ဆက်သွယ် သတင်းပေးသဖြင့် ပြည်မြို့မှ လူ့အခွင့်အရေး ကာကွယ်မြှင့်တင်သူ HRDP အဖွဲ့ဝင် ၃ ဦးကို အာဏာပိုင်များက ထောင်ဒဏ် ချမှတ်ခြင်းသည် လူ့အခွင့်အရေး ချိုးဖောက်ခြင်း ဖြစ်သည်ဟု HRDP က ဝေဖန်ပြောဆိုလိုက်သည်။

ဆန္ဒပြပွဲ အဖြစ်အပျက်များကို မီဒီယာများထံ ပြောဆိုခဲ့ပြီး၊ သံဃာတော်များ စီတန်း လမ်းလျှောက်စဉ် ဝိုင်းရံ ကာကွယ်ရေးအတွက် လူထုကို လှုံ့ဆော်ခြင်းကြောင့် ဟုဆိုကာ HRDP အဖွဲ့ဝင်များဖြစ်သည့် ပြည်မြို့မှ ကိုသက်ဦး၊ ကိုဇော်ထွန်း၊ သံဃာတော် ဦးပဏ္ဍိတ ခေါ် ဦးမြင့်အေးတို့ကို ပုဒ်မ ၅ဝ၅ (ခ) ဖြင့် ပြည်မြို့နယ် တရားရုံးက နိုဝင်ဘာလ ၇ ရက်နေ့တွင် ထောင်ဒဏ် ၂ နှစ် အပြစ်ပေးခဲ့ခြင်းအပေါ် HRDP ခေါင်းဆောင် ဦးမြင့်အေးက ယခုလို ဝေဖန်လိုက်ခြင်း ဖြစ်သည်။

“သူတို့ မီဒီယာနဲ့ စကားပြောတဲ့အခါမှာ ဘာမှားလဲ၊ မှားတဲ့အချက် ဘာပါလဲ။ အစိုးရ အကြည်ညိုပျက်အောင် မှားပြီး လုပ်ကြံပြောတာ ဘာပါလို့လဲ။ အရှိကို အရှိအတိုင်း ပြောကြမှာပေါ့။ ကျနော်တို့ရဲ့ လွတ်လပ်စွာ ပြောဆိုချက်ကို ကန့်သတ်လာတယ်၊ ချုပ်ချယ်လာတယ်လို့ ကျနော်တို့ ယူဆတယ်။ အဲဒါ ကျနော်တို့တွေ ကိုယ်တိုင်က အဲလို အခွင့်အရေးတွေ ချိုးဖောက်ခံနေရတယ်ဗျာ” ဟု သူက ပြောသည်။

ထောင်ဒဏ် အပြစ်ပေးခံရသည့် ၂ လမြောက်နေ့ ဖြစ်သည့် ယမန်နေ့က ဦးမြင့်အေးနှင့် တရားခံများ၏ အမှုကို ကူညီဆောင်ရွက်ပေးမည့် ရှေ့နေ ဦးခင်မောင်ရှိန်တို့က တရားခံများ၏ အမှုအပေါ် အယူခံဝင်ရန် ပြည်မြို့နယ် ခရိုင်တရားရုံးသို့ သွားရောက်ကာ အယူခံစာ တင်ခဲ့သော်လည်း ချက်ချင်း ပယ်ချခဲ့သည်။

ယခုအမှုအတွက် ထောင်ဒဏ် ၂ နှစ်ပေးခဲ့ခြင်းသည် အလွန်ကြီးလေးသည့် ပြစ်ဒဏ်ဖြစ်နေသဖြင့် လျှော့ပေါ့ပေးရန် အတွက် ခရိုင်တရားရုံးကို အယူခံတင်ခဲ့သော်လည်း ပယ်ချခံခဲ့ရသဖြင့် တိုင်းတရားရုံး ဖြစ်သည့် ပဲခူးတိုင်း တိုင်းတရားရုံးသို့ ယခုရက်ပိုင်းအတွင်း အယူခံစာ ပေးပို့ရန်အတွက် ကြိုးပမ်းနေသည်ဟု ဦးမြင့်အေးက ဆက်ပြောသည်။

အမှုကို တရားရုံးတွင် စစ်ဆေးခဲ့စဉ် အချိန်က တရားခံ ၃ ဦးအတွက် အကျိုးဆောင်ပေးမည့် ရှေ့နေ မရှိခဲ့ဘဲ၊ သက်သေ ထွက်ဆိုချက်မှာလည်း ဥပဒေလမ်းကြောင်းနှင့် ကိုက်ညီခြင်း မရှိဟု သူက ပြောသည်။

“ကျနော်တို့ ဖောက်ထွက်တဲ့ လမ်းကြောင်းက သူတို့က စီရင်ချက်မှာ ဝန်ခံထားတယ်ပေါ့ဗျာ။ ဝန်ခံတယ် ဆိုတာကလည်း လွတ်လပ်စွာ တရားခွင်မှာ ဝန်ခံတာလည်း မဟုတ်ဘူး။ ရဲအချုပ်မှာ စစ်ဆေးတဲ့အခါ ဝန်ခံထားတာ ဖြစ်နေလို့ ဒါကို ကျနော်တို့က ကန့်ကွက်တယ်ပေါ့ဗျာ။ ဒါက ရှေ့နေရဲ့ သဘောထားပါ” ဟု ဦးမြင့်အေးက ပြောသည်။

မြန်မာလူထုအကြား လူ့အခွင့်အရေး အသိပညာ နိုးကြားလာရေးအတွက် ဖြန့်ဝေ ပညာပေးနေသည့် HRDP ခေါ် လူ့အခွင့်အရေး ကာကွယ်မြှင့်တင်သူများ ကွန်ရက်အဖွဲ့ဝင် ၁ဝ ဦးထက်မနဲသည် ၎င်းတို့ သွားရောက်ပညာပေးရာ ဒေသများမှ အာဏာပိုင်များ၏ အုပ်စုလိုက် အကြမ်းဖက်ခြင်း၊ မီဒီယာနှင့် ဆက်သွယ်သောကြောင့် ဟုဆိုကာ မတရားသဖြင့် ဖမ်းဆီး ထောင်ချခြင်းများ ခံနေရသည်။

“ကျနော်တို့လူတွေ ဘာမှားလဲ။ ကျနော်တို့ ဥပဒေကို ဘာတွေ ကျော်နင်းလိုက်သလဲ။ ကျနော်တို့ လူ့အခွင့်အရေးကို ဘာတွေ ချိုးဖောက်လို့လဲ။ ကျနော်တို့ကတော့ ဥပဒေနဲ့ လူ့အခွင့်အရေး ထိပ်တိုက်တွေ့ရင် လူ့အခွင့်အရေးဘက်ကပဲ ရပ်တည်မှာပဲ။ ဒါမှ ကျနော်တို့ HRDP အဖြစ် ပြည်တွင်းမှာ ရပ်တည်လို့ ရနိုင်မှာဖြစ်တယ်။ အခုလို ဖမ်းဆီးတရားစွဲခြင်း၊ ထောင်ချခြင်းဟာ ကျနော်တို့အတွက် လက်ခံနိုင်ဖွယ် မရှိတဲ့ ကိစ္စဖြစ်တယ်လို့ ပြောချင်တယ်” ဟု ဦးမြင့်အေးက ပြောသည်။