နအဖ ဖိအားကြောင့် ဒေါ်စု ကျေညာချက်ကို ဆန့်ကျင်ရဟု တိုင်းရင်းသားအဖွဲ့များပြော

မဇ္ဈိမသတင်းဌာန
Thursday, 15 November 2007 18:38 - မြန်မာစံတော်ချိန်

နအဖ ၏ ဖိအားပေးမှုကြောင့် ပြည်တွင်းရှိ အပစ်အခတ်ရပ် အဖွဲ့အချို့မှ ဒေါ်အောင်ဆန်းစုကြည်၏ ကျေညာချက်အပေါ် ထုတ်ဖော် ဆန့်ကျင်နေကြသည်ဟု တိုင်းရင်းသား အဖွဲ့များက ပြောဆိုကြသည်။
နအဖ စစ်အစိုးရ၏ အာဘော်ကို ထုတ်ပြန်ပေးနေသည့် မြန်မာ့အလင်း သတင်းစာတွင် ယမန်နေ့နှင့် ယနေ့တွင် ပြည်တွင်းအခြေစိုက် ငြိမ်းချမ်းရေး ယူထားသည့် တိုင်းရင်းသား လက်နက်ကိုင် အဖွဲ့ ၆ ဖွဲ့နှင့် မြေပေါ်ပါတီ တခုသည် ယခုလ ၈ ရက်နေ့တွင် ထုတ်ပြန်ခဲ့သည့် ဒီမိုကရေစီ ခေါင်းဆောင် ဒေါ်အောင်ဆန်းစုကြည်မှ တွေ့ဆုံ ဆွေးနွေးရေး သဘောထားကို ဆန့်ကျင်ကန့်ကွက်ကြောင်း ထည့်သွင်း ကျေညာရခြင်းသည် စစ်အစိုးရမှ ဖိအားပေးခြင်းကြောင့် ဖြစ်သည်ဟု အဆိုပါအဖွဲ့များ၏ သတင်းရပ်ကွက်က ပြောဆိုကြခြင်း ဖြစ်သည်။


အပစ်အခတ်ရပ် အဖွဲ့များနှင့် နီးစပ်သူတဦးက “ငြိမ်း (ငြိမ်းချမ်းရေး အဖွဲ့) တွေကတော့ လွန်ခဲ့တဲ့ တရက်နှစ်ရက်က စပြီးတော့ အဲဒီ ကျေညာချက် ထုတ်ပြန်ဖို့ ခြိမ်းခြောက် ဖိအားပေးခံရတာ သေချာတယ်။ ငြိမ်းအဖွဲ့တွေ အကုန်လုံးက နအဖ နဲ့ အပေးအယူ ရှိတယ်လေ။ ဥပမာ DKBA ဆိုရင် သူ့တို့မှာ ရှိတဲ့ ကားတွေ၊ အိမ်တွေ၊ ခြံတွေ ပိုင်ဆိုင်မှုတွေကို စိုးရိမ်တယ်လေ။ နောက် သူတို့က အင်အားရှိတာ မဟုတ်ဘူး။ ဒါကြောင့် ဖိအားပေးလာပြီ ဆိုလို့ရှိရင် မလုပ်ချင်ရင်လည်း ခေါင်းညိတ်လိုက်ရတာပေါ့” ဟု ပြောသည်။
သူက ဆက်ပြီး ပအိုဝ်း အသိုင်းအဝိုင်းကလည်း ထုတ်ပြန် ကျေညာချက်သည် သူတို့၏ သဘောထား မဟုတ်ကြောင်းနှင့် နအဖ မှ ဖိအားပေးပြီး ထုတ်ခိုင်းခြင်း ဖြစ်ကြောင်း ပြန်လည် ပြောပြသည်။
သူတို့က တိုင်းရင်းသားများကို ဒေါ်အောင်ဆန်းစုကြည်မှ ကိုယ်စားပြုမည် ဆိုသည့်အချက်ကို ဆန့်ကျင်လိုက်ခြင်း ဖြစ်ပြီး နအဖ ၏ မူဝါဒလမ်းစဉ် ၇ ရပ် (လမ်းပြမြေပုံ) ကို အလေးအနက် ထောက်ခံကြောင်း တညီတညွတ်တည်း ပြောဆိုခဲ့ကြသည်။
ဒေါ်အောင်ဆန်းစုကြည်က “တိုင်းရင်းသား လူမျိုးစုများ၏ အကျိုးစီးပွားနှင့် ဆန္ဒ သဘောထားများကို တတ်နိုင်သမျှ ကျယ်ပြန့်စွာ အစဉ်တစိုက် အလေးအနက် ထည့်သွင်းစဉ်းစားရန် ကျမတွင် တာဝန် ရှိပါသည်။ ဤရည်မှန်းချက် အောင်မြင် ပေါက်ရောက်စေရန် အတွက်၊ အပြုသဘောဆောင်သည့် တွေ့ဆုံ ဆွေးနွေးရေး လမ်းကြောင်းအတိုင်း သွားရန် ကျမ ပိုင်းဖြတ်ထားပြီး ဖြစ်ပါသည်” ဟူ၍လည်း ကျေညာချက်တွင် ပြောဆိုထားခဲ့သည်။
နအဖ ၏ အမျိုးသား ညီလာခံတွင် လေ့လာသူအဖြစ် တက်ရောက်ခဲ့သော မွန်ပြည်သစ် ပါတီမှ တာဝန်ရှိသူ တဦးကလည်း ဖိအားပေးမှုကြောင့် ယခုလို ကျေညာချက်များ ထွက်ပေါ်လာခြင်း ဖြစ်ကြောင်း မဇ္ဈိမကို ပြောသည်။
မွန်ပြည်သစ်ပါတီမှ အရာရှိက “သူတို့ (နအဖ) က ရေးပြီးသား၊ စာစီပြီးသားကို လက်မှတ် ထိုးပေးပါဆိုပြီး သဘောတူညီချက်ရယူ လက်မှတ်ထိုးခိုင်းပြီး ထုတ်တာပဲ။ သူတို့ (တိုင်းရင်းသား ပါတီတွေ) ရေးတာမှ မဟုတ်ဘဲ။ ဖိအားပေးပြီး လုပ်တာပေါ့ဗျာ” ဟု ပြောသည်။
သူတို့ ပါတီအနေဖြင့် ဒေါ်အောင်ဆန်းစုကြည်၏ ထုတ်ပြန်ကျေညာချက်ကို ထောက်ခံပြီး လက်ရှိ နအဖ မှ ဆုပ်ကိုင်ထားသည့် မူဝါဒလမ်းစဉ် ၇ ခုသည် တွေ့ဆုံ ဆွေးနွေးရေးကို မည်သို့မျှ ဦးတည်လာမည် မဟုတ်ဟု သူက ဆက်ပြောသည်။
နအဖ သတင်းစာတွင် ဒေါ်အောင်ဆန်းစုကြည်၏ ကျေညာချက်အပေါ် ဆန့်ကျင်ကြောင်း ထုတ်ဖော် ပြောဆိုခဲ့သည့် အဖွဲ့များသည် ပြည်ထောင်စု ပအိုဝ်း အမျိုးသားအဖွဲ့ချုပ်၊ ပအိုဝ်း အမျိုးသားအဖွဲ့ချုပ်၊ တိုင်းရင်းသား စည်းလုံး ညီညွတ်ရေးပါတီ၊ ရှမ်းပြည် ကိုးကန့် ဒီမိုကရက်တစ် ပါတီ၊ ဝ’ အမျိုးသား ဖွံ့ဖြိုးတိုးတက်ရေး ပါတီ၊ တိုးတက်သော ဗုဒ္ဓဘာသာ ကရင်အမျိုးသား အစည်းအရုံး (DKBA) နှင့် ကယန်းအမျိုးသား ကာကွယ်ရေးတပ်တို့ ဖြစ်သည်။

မဇ္ဈိမ