Thursday, December 11, 2008

ဧရာဝတီတိုင်းတွင် နာဂစ်ကြောင့် ဘုန်းကြီးကျောင်း (၂,၀၀၀) နီးပါးပျက်စီး (၇) လကြာသည်ထိ ပြုပြင်မှု နှေးကွေး

NEJ/ ၁၀ ဒီဇင်ဘာ ၂၀၀၈



နာဂစ်မုန်တိုင်းတိုက်ခတ်ပြီး (၇) လကြာပြီဖြစ်သော်လည်း မုန်တိုင်းသင့်ဒေသများဖြစ်သည့် ဧရာဝတီတိုင်းရှိ နာဂစ်သင့်မြို့နယ်များအတွင်း မြို့ပေါ်နေထိုင်သူများနှင့် ကျေးရွာနေပြည်သူများ အစိုးရအကူအညီမရသည့်အ တွက် နေထိုင်ရန် အခက်အခဲများ ရှိနေဆဲဖြစ်သည်။

အဆိုပါအခက်အခဲများကို အစိုးရက ဖြေရှင်းမပေးသော်လည်း စေတနာရှင်များက ဧရာဝတီတိုင်းသို့ ကိုယ်တိုင်ဆင်း၍ နေအိမ်အခက်အခဲရှိသူများအတွက် နေအိမ်ဆောက်လုပ် လှူဒါန်းပေးခြင်းများ ဆောင်ရွက်လျက်ရှိသည်။

ဖျာပုံ၊ ဒေးဒရဲ မြို့နယ်များအတွင်း ဘုန်းကြီးကျောင်းများသာမက ဘုရားပုထိုးစေတီးများပါ ပျက်စီးခဲ့ရသည်များ ရှိကြောင်း၊ ဘုရားပုထိုး စေတီများ ပြန်လည်ပြုပြင်ရန်ထက် ဘုန်းတော်ကြီးကျောင်းများမှာ အရေးကြီးကြောင်း၊ လာမည့် ၁၃၇၁ ခုနှစ်အတွက် ၀ါဆိုကြမည့် ရဟန်းသံဃာများ၏ ဘုန်းကြီးကျောင်းများ အမိုးအကာ လိုအပ်ချက်များ ရှိနေသေးကြောင်း သိရှိရသည်။

“ဒေးဒရဲမြို့နယ်မှာ ဘုန်းကြီးကျောင်းတွေ (၂၅၀) ကျော်ရှိမယ်။ အချို့ကျောင်းတွေက မုန်တိုင်းကြောင့် အားလုံးပြိုတယ်။ အချို့က အမိုးအကာ လန်တယ်။ အချို့က အောက်ခြေကပဲ ယိုင်သွားတာရှိတယ်” ဟု ဒေးဒရဲမြို့နယ်ရှိ သာသနာရေးဆိုင်ရာ တာဝန်ရှိသူက ပြောသည်။

လူမှုဝန်ထမ်းကယ်ဆယ်ရေးနှင့် ပြန်လည်နေရာချထားရေး၏ တရားဝင်ထုတ်ပြန်သော စာရင်းများအရ ဧရာဝတီတိုင်းတွင် ဘုရား စေတီ (၃,၀၇၄) ဆူ၊ ဘုန်းကြီးကျောင်း (၁,၉၃၈) ကျောင်း၊ သီလရှင်ကျောင်း (၇၃) ကျောင်း၊ ခရစ်ယာန်ဘုရားကျောင်း (၁၈၂) ကျောင်း၊ မွတ်စလင်ဝတ်ပြုကျောင်း (၂၅) ကျောင်း၊ ဟိန္ဒူဘုရားကျောင်း (၂၂) ကျောင်း ပျက်စီးခဲ့ကြောင်း သိရသည်။

ဒေးဒရဲတွင် ကျေးရွာအုပ်စုပေါင်း (၉၃) အုပ်စုရှိသည့်အနက် မူလတန်းကျောင်း (၁၉၀) ကျော် ပျက်စီးသွားသည်။ ယခုပြန်လည်တည်ဆောက်ပြီးစီးသည်မှာ ကျောင်း (၃၀) ကျော်ခန့်သာရှိသေးသည်။ လူမှုဝန်ထမ်း ကယ်ဆယ်ရေးနှင့် ပြန်လည်နေရာချထားရေး၏ စာရင်းများအရ ပညာရေးကဏ္ဍအတွက် သုံးစွဲရန် ငွေကြေးသီးသန့်မထားရှိကြောင်း၊ ဧရာဝတီတိုင်းတွင် မူလတန်းကျောင်း (၁,၅၀၄) ကျောင်း၊ အလယ်တန်းကျောင်း (၁၃၉) ကျောင်း၊ အထက်တန်းကျောင်း (၆၉) ကျောင်း ပျက်စီးခဲ့ပြီး ပြန်လည်တည်ဆောက်မှုမှာ (၉၅) ရာခိုင်နှုန်း ပြီးစီးပြီဖြစ်ကြောင်း သိရသည်။

နာဂစ်မုန်တိုင်းတိုက်ပြီး (၂) လခန့်ကြာမှ စိုက်ပျိုးခဲ့ရသော ဧရာဝတီတိုင်းမှ လယ်သမားများ ပြီးခဲ့သည့် မိုးစပါးများ ရိတ်သိမ်းပြီးစီးလု ဖြစ်နေကြရာ အထွက်နှုန်းများ ပြီးခဲ့သည့်နှစ်ကထက် ထက်ဝက်ခန့် လျော့ကျကြောင်း သိရသည်။

(နာဂစ်အပြီး (၇) လကြာ ဧရာဝတီမြင်ကွင်း အထူး သတင်းဆောင်းပါး)

0 comments: